د پنجشېر ولایت د شهیدانو او معلولینو چارو ریاست لپاره نوی رئیس معرفي او خپله دنده یې رسماً پيل کړه
د افغانستان اسلامي امارت د ریاست الوزراء عالي مقام د حکم پر اساس او د شهیدانو او معلولینو چارو وزارت د لزوم دید او وړاندیز له مخې، محترم قاري عنايت الله د یوې رسمي غونډې په ترڅ کې د دې وزارت د کارکوونکو چارو رئیس محترم مولوي محمد موسی صدیقي له لوري کارکوونکو ته معرفي او خپله دنده یې رسماً پیل کړه.
د معرفي په دې غونډه کې د شهیدانو او معلولینو چارو وزارت د کارکوونکو چارو رئیس محترم مولوي محمد موسی صدیقي، د پنجشېر ولايت د والي مرستيال محترم ملا شاه ملنګ روح الله، د دې وزارت د دعوت او ارشاد رئيس محترم مفتي عبدالاحد مسعود، د جهادي مدرسې استاد محترم شیخ مسیح الله مصدق او د یاد ولایت اړوند یو شمېر رئيسانو او آمرینو شتون درلود.
په دې پروګرام کې محترم مولوی محمد موسی صدیقي په خپلو خبرو کې د هرې ادارې د موخو په ترلاسه کولو کې د تغیر او تبديل اهمیت ته اشاره وکړه او د محترم مولوي کمالالدین رحیمي چې تر دې وړاندې د پنجشېر ولایت د شهیدانو او معلولینو چارو رئیس په توګه دنده ترسره کوله، د شهيدانو ورثه وو او معلولیت لرونکو وګړو ته د خدمتونو وړاندې کولو په برخه کې د هغه هڅې وستایلې.
همداراز محترم مولوي محمد موسی صدیقي د کارکوونکو ترمنځ بشپړه همغږي، د اداري سلسلې مراتب مراعاتول، د شته سرچينو څخه مؤثره استفاده او د پلان او دندو لايحې له مخې د سپارل شویو چارو ترسره کول یې د هرې ادارې د پرمختګ لپاره مهم اصول وبلل.
په دې پروګرام کې د پنجشېر ولایت د والي مرستیال محترم ملا شاه ملنګ روح الله هم په ادارو کې د بدلون او تغيير پر اهمیت خبرې وکړې او د شهيدانو او معلولينو چارو نوي رئیس ته یې د بریا او پرمختګ هیله څرګنده کړه.
