د ننګرهار ولایت د شهیدانو او معلولینو چارو په ریاست کې د عزیزي بانک د اې، ټي، ام (ATM) ماشین نصب او ګټې اخیستنې ته وسپارل شو
معلولینو، یتیمانو او کونډو ته د نغدي مرستو په ورکړه کې د لازیاتو اسانتیاوو رامنځته کولو په موخه د ننګرهار ولایت د شهیدانو او معلولینو چارو ریاست په هڅو په یاد ریاست کې د عزیزي بانک د اې، ټي، ام (د پېسو اخیستلو اتومات) ماشین نصب او فعال شو.
په همدې موخه په جوړ شوي پروګرام کې د ننګرهار ولایت د والي مرستیال محترم مولوي عزیز الله مصطفی، د شهیدانو او معلولینو چارو رئیس محترم محمد صابر ځواک، د اقتصاد رئیس محترم مولوي عطاء الرحمان فاتح، د عزیزي بانک اجرائیوي رئیس، مدیرانو او ګڼو نورو مسؤلینو ګډون کړی وو.
د ننګرهار ولایت والي مرستیال یتیمانو، کونډو او معلولینو ته د ښو خدمتونو وړاندې کولو په برخه کې یې د دې ولایت د شهیدانو او معلولینو چارو رئیس محترم محمد صابر ځواک هڅې وستایلې او د عزیزي بانک له اجرائیوي رئیس څخه دې بیوزله او اړمن قشر ته یې د نغدي مساعدتونو په ورکړه کې د لازمو اسانتیاوو برابرولو په پار مننه وکړه.
