د ننګرهار ولایت د شهیدانو او معلولینو چارو ریاست لپاره نوی رئیس د محترم شیخ صاحب عبدالحکیم حقاني لخوا رسماً معرفي شو
د افغانستان اسلامي امارت د ریاست الوزراء عالي مقام د حکم پر اساس او د شهیدانو او معلولینو چارو وزارت د وړاندیز له مخې، محترم مولوي نورالحق حقاني د ننګرهار ولایت د شهیدانو او معلولینو چارو ریاست د نوي رئیس په توګه د محترم شیخ صاحب عبدالحکیم حقاني لخوا کارکوونکو ته رسماً معرفي او خپلې چارې پیل کړې.
د ننګرهار ولایت د شهیدانو او معلولینو چارو ریاست کې په همدې موخه جوړو شویو مراسمو کې د شهیدانو او معلولینو چارو وزارت مرستیال محترم شیخ صاحب عبدالحکیم حقاني، د ننګرهار ولایت د والي مرستیال محترم مولوي عزیز الله مصطفی، د دې وزارت د مالي او حسابي چارو رئیس محترم مولوي محمد امین درویش او یو شمېر نورو ولایتي مسؤلینو حضور درلود.
محترم شیخ صاحب عبدالحکیم حقاني د ننګرهار ولایت د شهیدانو او معلولینو چارو ریاست د نوي رئیس د معرفي په مراسمو کې وویل: په ادارو کې تغییر او تبدیلي یوه اړتیا ده، چې د اداري چارو د پرمختګ او ښه والي په موخه ترسره کېږي، هغه د نوي رئیس وړتیاوې او د خدمت کولو روحیه وستایله او هیله یې وښوده چې د ننګرهار ولایت مسؤلین او د یاد ریاست ټول کارکوونکي به له نوموړي سره لازمه همکاری وکړي.
محترم شیخ صاحب همداراز زیاته کړه: د دې ریاست لپاره نوی ټاکل شوی رئیس چې د خدمت اوږده سابقه او ښې تجربې لري، کولای شي د یتیمانو، کونډو او معلولینو لپاره لا ښه خدمتونه وړاندې کړي او له کارکوونکو یې وغوښتل چې د خپلو مشرانو اطاعت وکړي او د اړمنو کسانو د خدمت لپاره خپلې ټولې هڅې وکاروي، له هېڅ ډول همکارۍ څخه ډډه ونه کړي.
د شهیدانو او معلولینو چارو وزارت مرستیال د ننګرهار ولایت د شهیدانو او معلولینو چارو ریاست پخواني رئيس له خدمتونو څخه هم مننه او قدرداني وکړه، نوي رئیس ته یې د مسؤلیتونو په ترسره کولو کې د لا بریالیتوبونو هیله څرګنده کړه، همداراز محترم شیخ صاحب پر خیریه مؤسسو او مرستندویه بنسټونو هم غږ وکړ چې د یتیمانو، کونډو مېرمنو او معلولینو د ملاتړ په برخه کې اغېزمنه همکاري وکړي او د دې اړمن قشر د ودې او پیاوړتیا لپاره زمینه برابره کړي.
همدارنګه په دې مراسمو کې د ننګرهار ولایت د والي مرستیال محترم مولوي عزیز الله مصطفی د پخواني رئیس له مخلصانه خدمتونو یې قدرداني وکړه او نوي رئیس سره یې د اړوندو چارو په ترسره کولو کې د بشپړۍ همکارۍ ژمنه وکړه.
د یادونې وړ ده چې محترم مولوي نورالحق حقاني تر دې وړاندې د څارنې او ارزونې ریاست د رئيس په توګه دنده ترسره کوله.
