د شهیدانو او معلولینو چارو په وزارت کې د ولایتي رئیسانو او کارکوونکو د ظرفیت لوړونې په موخه روزنیز پروګرام پیل شو
په هغو مراسمو کې چې په همدې موخه د شهیدانو او معلولینو چارو وزارت کې جوړ شوي وو، په هغې کې د شهیدانو او معلولینو چارو وزارت سرپرست وزیر ښاغلي ملا عبدالمجید آخوند، د تخنیکي او مسلکي چارو مرستیال ښاغلي مولوي عبدالرزاق آخند، د شهیدانو او معلولینو چارو مرستیال ښاغلي شیخ صاحب عبدالحکیم حقاني، د مالي او اداري چارو عمومي رئیس ښاغلي مولوي کلیم الله افغان او د نورو اړوندو څانګو رئیسانو ګډون درلود.
د یاد روزنیز پروګرام په پرانیست غونډه کې د شهیدانو او معلولینو چارو وزارت سرپرست وزیر، ښاغلي ملا عبدالمجید آخند د غونډې ګډونوالو ته ښه راغلاست ووایه او هغوی یې وهڅول تر څو زده کړې ته د ځانګړي شوي وخت څخه په ښه توګه ګټه واخلي.
د مالي او اداري چارو عمومي رئیس ښاغلي مولوي کلیم الله افغان چې په یاده غونډه کې ولایتي رئیسانو او کارکوونکو ته د ورکشاپ پر اهمیت خبرې کولې وویل: له راغلي ترینرانو او استادانو د زده کړو په ګټې اخیستنې سره کولاې شو، د ښې حکومتولۍ په برخه کې راسپارل شوي مسؤلیتونه په ښه ایماندارۍ او اخلاص سره سرته ورسوو.
نوموړي همداراز د ولایتي رئیسانو لخوا د شهیدانو او معلولینو چارو وزارت د طرحې سره سم د بودیجې پر شفاف او پر وخت مصروفول، لویه لاسته راوړنه وبلله.
د یاد روزنیز ورکشاپ په ترڅ کې د شهیدانو او معلولینو چارو وزارت د بشري سرچینو رئیس ښاغلي مولوي محمد موسی صدیقي د یاد روزنیز ورکشاپ پر اهمیت خبرې وکړې او زیاته یې کړه: د دې روزنیز ورکشاپ په ترڅ کې به د یاد وزارت اړوند ولایتي رئیسانو او کارکوونکو ته د اداري موضوعاتو، مکتوب لیکنې او پلان جوړونې په برخه کې مهارتونه ورزده کړل شي.
یاد ورکشاپ د شهیدانو او معلولینو چارو وزارت د بشري سرچینو ریاست د ظرفیت لوړونې پروګرامونو د آمریت له لورې په لاره اچول شوی چې په هغه کې به د شهیدانو او معلولینو چارو وزارت ولایتي رئیسانو او کارکوونکو ته د یوې اونۍ په موده کې د ملکي خدمتونو انسټیټیوټ د استادانو له لوري مسلکي زده کړي ورکړل شي.
د یادولو وړ ده چې په یاد ورکشاپ کې د شهیدانو او معلولینو چارو وزارت (۸۰) تنه ولایتي کارکوونکي ګډون لري چې د ورکشاپ په پای کې به ګډونوالو ته تصدیق نامې هم ورکړل شي.
