د شهیدانو او معلولینو چارو وزير محترم الحاج ملا عبدالمجید آخند بامیان ولایت ته سفر وکړ
د شهیدانو او معلولینو چارو وزير محترم الحاج ملا عبدالمجید آخند چې د دعوت او ارشاد رئيس محترم مفتي عبدالاحد مسعود يې ملتيا کوله، بامیان ولایت ته یې سفر وکړ، هلته یې د بامیان ولایت له والي محترم الحاج قاري ګل حیدر شفق، یو شمېر علماوو، د شهیدانو ورثه وو او معلولیت لرونکو وګړو سره وکتل.
په پیل کې د بامیان ولایت والي محترم قاري ګل حیدر شفق، محترم الحاج ملا عبدالمجید آخند ته ښه راغلاست وویل، نوموړي دغه سفر د خلکو د خدمت په برخه کې د اسلامي امارت د مسئولینو د جدي ژمنتیا او ځانګړې پاملرنې څرګندونه وبلله.
نوموړي زیاته کړه چې د شهیدانو او معلولینو چارو وزارت رهبري د ولایتي سفرونو له لارې د شهیدانو کورنیو او معلولینو د وضعیت د ارزونې لپاره دا زمینه برابروي، څو د هغوی ستونزو ته پر وخت رسېدګي وشي او اړینې مرستې ورته برابرې شي، هغه د شهیدانو ورثه وو او معلولینو د اساسي ستونزو پر حل ټینګار وکړ.
په دې ليدنه کې محترم مفتي عبدالاحد مسعود د شهیدانو د یو شمېر وارثینو ته یې د نغدي مرستو د وېش ترڅنګ، د شهیدانو او معلولینو چارو وزارت له خوا د مادي او معنوي ملاتړ پر دوام ټینګار وکړ او د دغو کورنیو د ژوند د ښه والي لپاره یې د راتلونکو پروګرامونو د پلي کیدو یادونه هم وکړه.
همداراز د بامیان ولایت شهیدانو او معلولینو چارو رئیس محترم علي خان احمدي د ياد رياست د فعالیتونو او لاسته راوړنو تفصیلي راپور وړاندې کړ او د یتیمانو، کونډو او معلولینو ستونزو ته د پر وخت رسیدګي لپاره یې پر دوامداره هڅو ټینګار وکړ، همدارنګه یې د یاد ریاست له لوري یتیمانو کورنيو او معلولینو ته يې د غوره خدمتونو وړاندې کولو ډاډ ورکړ.
په دې لیدنه کې د بامیان ولایت د شیعه علماوو شورا رئیس محترم نصرالله واعظي د شهیدانو او معلولینو چارو وزارت هغه اغېزمن اقدامات وستایل چې د شهیدانو وارثینو او معلولینو د وضعیت د ښه والي لپاره يې ترسره کړي دي.
نوموړي د وزارت له رهبرۍ وغوښتل چې په بامیان ولایت کې د پاتې مستحقو کورنیو د ثبت او راجستر بهیر ته پاملرنه وکړي، څو هغوی هم خدماتو او مرستو ته لاسرسی ومومي.
