د شهیدانو او معلولینو چارو وزارت مرستیال محترم شیخ صاحب عبدالحکیم حقاني کنړ ولایت ته د سفر په ترڅ کې د یاد ولایت له والي سره وکتل
د شهیدانو او معلولینو چارو وزارت مرستیال محترم شیخ صاحب عبدالحکیم حقاني چې د خاصو شهیدانو (فدايانو) کورنېو او یتیمانو پر وړاندې د شته ستونزو او همداراز یتیمانو، کونډو او معلولینو ته د خدمتونو وړاندې کولو د څرنګوالي په موخه کنړ ولايت ته سفر کړی وو، نن یې د کنړ ولایت له والي محترم مولوي قدرت الله ابوحمزه سره وکتل.
شیخ صاحب په دې لیدنه کې د شهیدانو او معلولینو چارو وزارت له لوري د خاصو شهیدانو (فدایانو) له کورنېو سره د فوق العاده مرستو یادوونه وکړه او همداراز یې د کنړ ولایت د شهیدانو او معلولینو چارو ریاست پر وړاندې د پرتو ستونزو لکه د یاد ریاست لپاره د معیاري ودانۍ نشتون، په دولتي اداراتو کې د خاصو شهیدانو (فدایانو) د وروڼو ګمارل، د شهیدانو ورثه ؤ او معلولینو او په ځانګړې ډول د خاصو شهیدانو (فدایانو) له کورنېو سره د مرستو ترسره کولو یادوونه وکړه.
په دې لیدنه کې د کنړ والي محترم مولوي قدرت الله ابو حمزه خبرې وکړې او زیاته یې کړه: "اسلامي امارت د ټولو اقشارو ګډ نظام او کور دی، د شهیدانو وارثین او معلولین د دې هېواد ریښتیني مستحق کسان دي او د دوي پر وړاندې پرتو ستونزو او ننګونو ته به لازمه رسیدګي وشي. هغه همداراز په کنړ ولایت کې د شهیدانو او معلولینو چارو ریاست لپاره د اداري تعمیر او همدارنګه د شهیدانو کورنېو او معلولینو ته د مرستو په برخه کې د هراړخیزې همکارۍ ډاډ ورکړ."
د یادونې وړ ده چې په دې لیدنه کې د کنړ ولایت د شهیدانو او معلولینو چارو رئیس محترم مفتي عبیدالله حقاني او د خاصو شهیدانو آمر محترم مولوي محمد اظهار هم ګډون درلود.
