د شهیدانو او معلولینو چارو وزارت مرستیال محترم شیخ صاحب عبدالحکیم حقاني د نداء الخیر مؤسسې له رئیس سره وکتل
د شهیدانو او معلولینو چارو وزارت مرستیال محترم شیخ صاحب عبدالحکیم حقاني په خپل کاري دفتر کې د نداء الخیر مؤسسې له رئيس محترم حمزه کوکسال او راغلي پلاوي سره وکتل، د دې کتنې پر مهال د بهرنيو اړیکو او پلان رئیس محترم ملا صدوخان حق شناس هم حضور درلود.
په دې لیدنه کې، محترم شیخ صاحب د یتیمانو او معلولینو پر وړاندې د شته ستونزو او ننګونو په تړاو خبرې وکړې او د مؤسسې له مسؤلینو یې وغوښتل چې د شهیدانو او معلولینو چارو وزارت سره په همغږۍ د دې اړمن قشر د اقتصادي ځان بسیاینې په برخه کې د فني او حرفوي زده کړو پروګرامونه په لاره واچوي، د فلج معلولینو لپاره ځانګړې خونې جوړې کړي، معلولینو ته برېښنايي ویلچیرونه برابر کړي تر څو هغوی د نورو له محتاجې خلاصی ومومي.
همداراز محترم شیخ صاحب ډاډ ورکړ چې ټولې هغه مرستې چې د خیریه مؤسسو له خوا د شهیدانو او معلولینو چارو وزارت سره کېږي، په شفاف او منظم ډول مستحقو کسانو ته رسول کېږي او هر خیریه بنسټ او مرستندویه مؤسسه چې د دې اړمن قشر سره د مرستو ترسره کولو چمتوالی وښيې، د شهیدانو او معلولینو چارو وزارت چمتو دی چې ورسره هر اړخیزه همکاري وکړي، ځکه زموږ اساسي موخه دا ده چې اړمن کسان په ځان بسیا شي.
د دې لیدنې په ترڅ کې د ترکیې هېواد د ځینو سوداګرو له لوري یو شمېر معلولینو ته د چمتو شویو چپرکټونو د تسلیمۍ پر څرنګوالي هم خبرې وشوې.
په ورته وخت کې د نداء الخیر مؤسسې مسؤلینو ډاډ ورکړ چې د شهیدانو او معلولینو چارو وزارت سره په همغږۍ به د یتیمانو او معلولینو لپاره اړینې مرستې برابرې کړي.
