د شهیدانو او معلولینو چارو وزارت له ابرار مؤسسې سره د معلولیت لرونکو کسانو د فزیکي بیا وړتیا موندنې د خدمتونو د کیفیت لوړولو په موخه هوکړه لیک لاسلیک کړ
یاد هوکړه لیک د شهیدانو او معلولینو چارو وزارت د پلان او همغږۍ رئیس ښاغلي سید محمد عظیم آغا او د ابرار مؤسسې مسؤل ښاغلي ډاکټر عبدالبصیر توریالي ترمنځ لاسلیک شو.
په پام کې ده چې د دې هوکړه لیک له مخې به د ابرار مؤسسه په پکتیا ولایت کې (۴۰۴۰) تنو معلولینو او د جګړې قربانیانو ته د فزیکي او ارتوپیدي د بیاوړتیا موندنې پرمختللي خدمات وړاندې کړي.
یاد خدمتونه چې د پکتیا ولایت د شهیدانو او معلولینو چارو ریاست سره په همغږۍ ترسره کیږي، نوموړې مؤسسه به د اوو میاشتو په موده کې د معلولیت لرونکو وګړو لپاره د مصنوعي غړو جوړونې، د مرستندویه وسایلو تولید، د فزیوتراپي خدمتونو وړاندې کولو، د مصنوعي غړو د بیارغونې او معلولیت لرونکو وګړو د بیا وړتیا موندنې د څرنګوالي په اړه د پوهاوي ورکولو په برخو کې د (۱۰۹۵۳۹) ډالرو په ارزښت خدمات وړاندې کړي.
