د شهیدانو او معلولینو چارو وزارت د کارکوونکو د ظرفیت لوړونې په موخه روزنیز پروګرام پیل شو
د بشري سرچینو ریاست د ظرفیت لوړونې پروګرامونو آمریت له لورې د شهیدانو او معلولینو چارو وزارت کارکوونکو ته روزنیز پروګرام پیل شو.
د یاد روزنیز پروګرام په پرانیست غونډه کې د شهیدانو او معلولینو چارو وزارت د مالي او اداري چارو عمومي رئیس ښاغلي مولوي کلیم الله افغان د خبرو په ترڅ کې وویل: څلویښت کلنو ناخوالو په هېواد کې ډیر څه له منځه وړي دي او موږ ته پکار ده چې د هېواد په بیارغونه کې کوټلی ګامونه واخلو، نوموړي د اداري اصلاحاتو او ملکي خدمتونو د خپلواکې ادارې څخه راغلي ترینرانو څخه د مننې تر څنګ هغوی ته سپارښتنه وکړه چې د یاد وزارت د کارکوونکو په روزنه کې هر اړخیزې هلې ځلې وکړي.
د یاد روزنیز پروګرام په ترڅ کې د شهیدانو او معلولینو چارو وزارت د بشري سرچینو رئیس ښاغلي محمد موسی صدیقي هم د کارکوونکو لپاره د دې ډول روزنیز پروګرامونو په لاره اچول مهم او اړین وباله، نوموړي زیاته کړه: د دې روزنیز پروګرام په ترڅ کې به د یاد وزارت کارکوونکو ته د اداري اصولو، مکتوب لیکنې او پلان جوړونې په برخه کې مهارتونه ورزده کړل شي.
د یادونې وړ ده چې یاد روزنیز پروګرام د شهیدانو او معلولینو چارو وزارت د مقام د هدایت سره سم په لاره اچول شوې دې، چې د کارکوونکو د ظرفیت لوړونۍ روزنیز پروګرام په پای کې به د یاد وزارت لخوا ممتازو ګډونوالو ته ستاینلیکونه هم ورکول کیږي
