د شهیدانو او معلولینو چارو وزارت د معلولیت لرونکو وګړو څخه د ملاتړ او هغوی سره د مرستو په موخه د (HHRD) مؤسسې سره دوه هوکړه لیکونه لاسلیک کړل
یاد هوکړه لیکونه د شهیدانو او معلولینو چارو وزارت د بهرنیو اړیکو او پلان ریاست وارسي کوونکي ښاغلي قاری شریف الله گلزاد او د (دست های کمک برای پیشرفت و کمک) یا(HHRD) مؤسسې رئیس ښاغلي عبیدالله فیصل تر منځ لاسلیک شول چې د یو هوکړه لیک له مخې به د بدخشان، بلخ، فراه او ننګرهار ولايتونو (۳۳۰) تنو معلولیت لرونکو وګړو ته ويلچيرونه ووېشل شي.
په دویم هوکړه لیک کې د شهیدانو د وارثینو او معلولینو لپاره د معیشت او خوراکي خوندیتوب د بدیل پروګرام پلي کول شامل دي چې د هغه له مخې به په کابل، لغمان او ننګرهار ولایتونو کې د حرفوي زده کړو، د خوړو خوندیتوب او د شهیدانو او معلولینو کورنیو ته د اقتصادي ځان بساینې زمینه برابره شي.
د يادونې وړ ده، چې د يادو شویو تړونونو ټوليز ارزښت (٣٤٢٥٠٠) درې لکه دوه څلوېښت زره پنځه سوه امريکايي ډالره دى، چې هره يوه به يې په راتلونکو څلورو څخه تر پنځو میاشتو په موده کې بشپړه شي.
