د شهیدانو او معلولینو چارو وزارت د رهبرۍ شورا غونډه جوړه شوه
د شهیدانو او معلولینو چارو وزارت د رهبرۍ شورا غونډه د یاد وزارت د سرپرست وزیر ښاغلي ملا عبدالمجید اخند په مشرۍ او دشهیدانو او معلولینو چارو وزارت د برنامو او همغږۍ مرستیال ښاغلي مولوي عبدالرزاق اخند په ګډون او د اړوندو ادارو رئیسانو په شتون کې ترسره شوه.
دا غونډه چې د قرآن عظیم الشان د څو مبارکو آیاتونو په تلاوت سره پیل شوه، لومړۍ د شهیدانو او معلولینو چارو وزارت د دعوت او ارشاد رئیس ښاغلي مولوي عبدالاحد مسعود خبرې وکړې او د اړوندو ادارو له رئیسانو څخه یې وغوښتل چې په خپلو ورځنۍ چارو ترسره کولو کې د اسلام له لارښوونو سره سم عمل وکړي.
د شهیدانو او معلولینو چارو وزارت سرپرست وزیر ښاغلي ملا عبدالمجید آخند په نننۍ ناسته کې په ګاونډي هيواد پاکستان کې میشت یتیمانو او معلولیت لرونکو وګړو د تثبیت د پروسې د پېل یادونه وکړه او پرېکړه وشوه، هغه یتیمان او معلولیت لرونکي وګړي چې په پاکستان کې کډوال دي د تثبیت پروسه به یې سبا پېل شي.
همدارنګه د شهیدانو او معلولینو چارو وزارت د برنامو او همغږۍ مرستیال ښاغلي مولوي عبدالرزاق اخند هم د هغو بنسټونو د فعالیتونو په اړه چې د معلولیت لرونکو وګړو او د یتیمانو د هوساینې په برخه کې کار کوي خبرې وکړې هغه وویل چې دوی باید خپل کارونه او فعالیتونه د شهیدانو او معلولینو چارو وزارت په چوکاټ کې تنظیم کړي، تر څو له یوې خوا د دې ډول ادارو کړنې څرګندې شي او له بلې خوا د شهیدانو او معلولینو په وزارت کې د یتیمانو او معلولیت لرونکو وګړو د تثبیت کچه څرګنده شي.
په دې غونډه کې د شهیدانو او معلولینو چارو وزارت د بشري سرچینو رئیس ښاغلي مولوي محمد موسی صدیقي هم د معلولیت لرونکو کسانو د تثبیت پروسې په اړه خبرې وکړې، هغه زیاته کړه، د معلولیت لرونکو وګړو د تثبیت کچه پراخه ده او هره ورځ څه باندې ۵۰۰ تنه د کابل ولایت د شهیدانو او معلولینو چارو ریاست کې ثبتېږي.
د یادونې وړ ده: هغه کسان چې د هیواد تایید شوې پیژند پاڼه ولري په دې پروسه کې به شامل شي.
