د شهیدانو او معلولینو چارو وزارت د رهبرۍ شورا غونډه ترسره شوه
د شهیدانو او معلولینو چارو وزارت د رهبرۍ شورا غونډه د یاد وزارت د تخنیکي او مسلکي چارو مرستیال ښاغلي مولوي عبدالرزاق آخند په مشرۍ، د شهیدانو او معلولینو چارو مرستیال ښاغلي شیخ صاحب عبدالحکیم حقاني، او د اړوندو څانګو د رئیسانو په شتون کې ترسره شوه.
د یادې غونډې موضوعات چي د شهیدانو او معلولینو چارو وزارت د دفتر رئیس ښاغلي قاري شاه محمد دوست لخوا غونډې ته وړاندې شول په هغې کې د معلولیت لرونکو وګړو د بایومټریک د پروسې د څرنګوالي په هکله چې د روانې اونۍ د دوشنبې په ورځ به پیل شي، خبرې وشوې او همدارنګه په ولایتونو کې د معلولینو د تثبیت په فورمو کې د هغوی د بریښنایي پیژندپاڼو نشتون یوه له اساسي ستونزو څخه وه چې په ګوته شوه.
په دې غونډه کې پرېکړه وشوه، چې د هغو معلولیت لرونکو وګړو لپاره چې بریښنايي پیژند پاڼې لري هغوی ته د هویت کارتونه ترتیب، او د مشرانو په موافقې سره سم له بایومټریک وروسته به معلولینو ته ورکړل شي.
په دې غونډه کې په ولایتونو کې د شهیدانو او معلولینو چارو رئیسانو ته سپارښتنه وشوه تر څو هغه معلولین چې بریښنايي پیژند پاڼې نلري، هغوی ته د برېښنايي پېژندپاڼو د وېش زمینه برابره کړي.
دغه راز په دې غونډه کې د لاوارثه يتيمانو او فلجیانو د پالنې مرکز ته د نویو فلج معلولینو د ثبت د څرنګوالي په باب هم خبرې وشوې او پریکړه وشوه، چې د نوي فلج معلولینو د ثبت بهير دې په ياد مرکز کې ترسره نه شي، ځکه چې په دې برخه کې کار روان دې او د ليږد بهير به یې د ملي دفاع وزارت له خوا ترسره شي.
همدارنګه د فلج مجاهدينو د انتقال د مسئلې په اړه د عالیقدر امیر المؤمنین شیخ الحدیث و القرآن هیبت الله اخندزاده حفظه الله له خوا يو فرمان هم صادر شوې وو، چې په هغې کې د فلج مجاهدينو د انتقال موضوع په صراحت ډول څرګنده شوې وه، او په یاد فرمان کې د تیرې ادارې د نظامي او ملکي فلج معلولینو د لیږد په هکله هيڅ يادونه نده شوې.
