د شهیدانو او معلولینو چارو وزارت او د (HHRD) نړیوالې مؤسسې ترمنځ د همکارۍ هوکړه لیکونه لاسلیک شول
د شهیدانو او معلولینو چارو وزارت د یتیمانو کورنیو، معلولینو او له ګاونډیو هېوادونو څخه بېرته راستانه شوو هېوادوالو اقتصادي ستونزو ته د ښې رسیدنې او د هغوی د ملاتړ او لاسنیوي په موخه د (HHRD) نړیوالې مؤسسې سره د (۶) میلیونه او (۴۰۷) زره افغانیو په ارزښت د همکارۍ درې هوکړه لیکونه لاسلیک کړل.
د لومړي هوکړه لیک له مخې به د زابل، لغمان، ننګرهار او بلخ ولایتونو (۳۶۰۰) تنو یتیمو زدهکوونکو ته د هغوی د ښوونیزو اړتیاوو د پوره کولو او د زدهکړو بهیر د ښه ملاتړ په موخه قرطاسیې چمتو او ووېشل شي.
همداراز د دویم هوکړه لیک له مخې به د کاپيسا، جوزجان او غزني ولایتونو (۹۰۰) تنو مستحقو کسانو ته، چې یتیمان، کونډې، معلولین او له ګاونډیو هېوادونو څخه بېرته راستانه شوي هېوادوال پکې شامل دي، ژمني توکي چمتو او ووېشل شي، څو د هغوی د ژوند لومړنۍ اړتیاوې تر یوه حده پوره شي.
د درېیم هوکړه لیک پر بنسټ به د لغمان او کابل ولایتونو (۶۰) تنو یتیمانو او معلولینو ته د کاري فرصتونو د برابرولو او اقتصادي ځانبسیاینې په موخه لاس ګاډي او د پلور او کاروبار د پیل لپاره نور اړین وسایل چمتو او د هغوی په واک کې ورکړل شي.
د همکارۍ دغه هوکړه لیکونه د شهیدانو او معلولینو چارو وزارت د پلان، بهرنیو اړیکو او تقنین چارو رئیس محترم مولوي ثناء الله فرقاني او د یادې مؤسسې د رئیس محترم قاري عبیدالله فیصل ترمنځ لاسلیک شول او د یادو ولایتونو د شهیدانو او معلولینو چارو ریاستونو سره په همغږۍ به تطبیق شي.
