د شهیدانو او معلولینو چارو وزارت او د (HHRD) خیریه مؤسسې ترمنځ د څه باندې (۱۱) میلیونه افغانیو په ارزښت هوکړه لیک لاسلیک شو

د شهیدانو او معلولینو چارو وزارت معلولیت لرونکو وګړو لپاره د بېاځواکمنتیا موندنې خدمتونو، همداراز د یتیمانو او کونډو لپاره د صحي خدمتونو او یو شمېر معلولینو ته د ویلچرونو د برابرولو په موخه د (۱۱) میلیونه، (۷۲) زره او (۷۹۵) افغانیو په ارزښت هوکړه لیک لاسلیک کړ، د دې هوکړه لیک پر اساس به، په کابل، لغمان، ننګرهار، کنړ، پروان، هلمند او پنجشېر ولایتونو کې (۳۶) زره او (۳۶۰) تنو مستحقو معلولیت لرونکو وګړو ته د بیاځواکمنتیا خدمتونه او همداراز اړمنو یتیمانو او کونډو ته روغتیایي خدمتونه وړاندې شي،له دې جملې څخه به (۲۰۰) تنو معلولیت لرونکو وګړو ته په هلمند او پنجشېر ولایتونو کې ویلچرونه ووېشل شي.

یاد هوکړه لیک د دې وزارت د بهرنیو اړیکو، پلان او تقنین چارو رئیس محترم مولوي ثناء الله فرقاني او د (HHRD) نړیوالې مؤسسې مرستیال محترم همایون نوري ترمنځ لاسلیک شو، چې د یوه کال په موده کې به د یادو ولایتونو د شهیدانو او معلولینو چارو ریاستونو سره په همغږۍ تطبیق شي.

د یادونې وړ ده چې تر دې وړاندې هم د (HHRD) نړیوالې مؤسسې زرګونو تنو یتیمانو، کونډو او معلولینو په بېلابېلو برخو کې خدمتونه وړاندې کړي دي.