د شهیدانو او معلولینو چارو وزارت او د افغانستان د پراختیا او بیارغونې مؤسسې ترمنځ د همکارۍ هوکړه لیک لاسلیک شو
د شهیدانو او معلولینو چارو وزارت د معلولیت لرونکو وګړو د اقتصادي ځان بسیاینې په موخه، د افغانستان د پراختیا او بیارغونې (ARGO) مؤسسې سره د (۱۴۵) زره ډالرو په ارزښت د همکارۍ هوکړه لیک لاسلیک کړ، چې له مخې به یې د کابل ښار د درېیمې او څلورمې ناحیو اړوند (۸۰) تنو معلولیت لرونکو کسانو ته د موبایل ترمیم او خیاطۍ برخو کې د مسلکي او باتجربه استادانو له خوا زده کړې ورکړل شي، څو یاد کسان اړین مسلکي مهارتونه زده کړي او د کار او دوامداره عاید د ترلاسه کولو لپاره ورته زمینه برابره شي.
د دې هوکړه لیک پر اساس به د هر معلول لپاره د بیاځواکمنتیا وسایل او همداراز د زده کړو څخه د فراغت پر مهال به ورته د کار د پیل په موخه اړین وسایل او امکانات هم برابر شي.
دغه هوکړه لیک د شهیدانو او معلولینو چارو وزارت د پلان، بهرنیو اړیکو او تقنین چارو رئیس محترم مولوي ثناء الله فرقاني او د یادې مؤسسې د رئیس محترم محمد فهیم کریمي ترمنځ لاسلیک شو چې د (۱۱) میاشتو په موده کې به د دې وزارت د ټولنیزو خدمتونو د تنظیم ریاست سره په همغږۍ تطبیق شي.
