د شهیدانو او معلولینو په چارو کې د دولت وزارت او اړوندو ادارو تر منځ د نوي برېښنایي سیستم د تطبیق طرزالعمل لاسلیک شو
د شهیدانو او معلولینو په چارو کې د دولت وزارت او اړوندو ادارو تر منځ د نوي برېښنایي سیستم د تطبیق طرزالعمل لاسلیک شو.
یاد طرزالعمل نن د حکومت د رسنیو په مرکز کې د شهیدانو او معلولینو په چارو کې د دولت وزیر ښاغلي لعل الدین آریوبي په حضور کې د دې وزارت د تخنیکي چارو مرستیالې جمیلې نورستانۍ، د ملي دفاع، کورنیو چارو او مالیې وزارتونو د استازو له لوري د حکومت د رسنیو په مرکز کې لاسلیک شو.
د شهیدانو او معلولینو د حقوقو د مدیریت لپاره د واحد مرکزي سیستم رامنځته کولو حکم د جلالتماب جمهور رییس له خوا صادر او اړوندو ادارو ته لارښوونه شوې وه، چې د شهیدانو او معلولینو په چارو کې د دولت وزارت او اړوندې ادارې دې له نوي برېښنایي سیستم څخه د ګټې اخیستنې په موخه په ډېټابېس کې درج د ټولو معیارونو او مسولیتونو مشخصونکی طرزالعمل په مشترکه توګه جوړ او تطبیق کړي.
دا چې د شهیدانو وارثین او معلولیت لرونکو وګړو د حقوقو په ورکړه کې ځنډ رامنځته کېده او اړتیا وه چې د اړوندو ادارو تر منځ ښه همغږي رامنځته شي، د دې سیسټم پر بنسټ به ټولې ادارې په خپلو برخو کې دې قشر ته رسیدنه وکړي.
د سیستم د رامنځته کېدو اصلي موخه د شهیدانو او معلولینو د حقوقو مدیریت، په چارو کې د روڼتیا تامین او یادو قشرونو ته د پر وخت او چټکو خدمتونو وړاندې کول او شهیدانو او معلولینو په چارو کې د دولت وزارت او اړوندو ادارو له لوري د شهیدانو وارثین او معلولین یوه واحد سیستم ته پورته کړي.
نوی برېښنایي سیستم ته د شهیدانو او معلولینو په چارو کې د دولت وزارت ټول پخواني معلومات لېږدول شوي دي. یاد سیستم داسې ډیزاین شوی، چې ټولې مرحلې (راجسټرېشن، تثبیت، محاسبه، تادیات او مالي کنټرول) چارې ترسره کوي. د شهیدانو وارثینو او معلولیت لرونکو وګړو ته د بانکي حسابونو پرانیستلو او د دې سیستم له لارې د لا زیاتو اسانتیاوو رامنځته کولو په موخه اړوندو بانکونو د لیستونو استول هم تنظمیږي.
د نوي برېښنایي سیستم تخنیکي ډله تر ډېرو هڅو وروسته بریالۍ شوه، چې د شهیدانو وارثینو او معلولیت لرونکو وګړو ته د حقوقو ورکړې سیستم د مالیې وزارت د پیسو ورکړې سیستم سره په انلاین توګه ونښلوي او دا حوالې به له دې وروسته په برېښنایي توګه ولېږل شي. د سیستم پراخېدو سره به د شهیدانو او معلولینو ولایتي آمریتونو ته هم ورسره وصل شي.
د نوي برېښنایي سیستم د تطبیق طرزالعمل لس پړاوه لري او د جمهوري ریاست عالي مقام په حکم ورته د مرکز او ولایاتو په کچه باصلاحیته کمېټې ټاکل شوي دي. په یادو لسو مرحلو کې د شهیدانو د وارثینو او معلولیت لرونکو وګړو د اسناد څېړنه، سمونه، ثبت، سیستم ته لېږدول، د اسنادو تایید او تثبیت، نویو ثبت شویو معلولینو او د شهیدانو وارثینو ته د بانکي حسابونو پرانیستل، د برېښنایي سیستم له لارې د معلولیت او شهادت کارتونو چاپول، برېښنایي آرشیف، د حقوقو محاسبه او مالي چارو څارنه او کنټرول شامل دي.
د یادې هرې برخې د عملي کولو لپاره په طرزالعمل کې اړینې لارښوونې، وړاندیزونه، د اړوندو ادارو اړتیاوې او د پام وړ ټکي یاد شوي، چې د نوي برېښنایي سیستم په تطبیق کې ضروري دي.
