د شهيدانو او معلولينو چارو سرپرست وزير د علي خېلو قوم عالي شورا سره ليدنه
د شهيدانو او معلولينو چارو سرپرست وزير د علي خېلو قوم عالي شورا سره ليدنه
نن چهارشنبه د غبرګولي په ۵مه، د شهيدانو او معلولينو چارو سرپرست وزير پوهنمل حميدالله فاروقي د علي خېلو قوم عالي شورا مشرتابه او غړو سره وکتل او د هغوی ستونزې، غوښتنې او وړانديزونه يې واوريدل.
په پيل کې د علي خېلو قوم عالي شورا مشرتابه د شورا جوړښت او موخو په تړاو خبرې وکړې او د مرکز په ګډون نږدې په ټولو ولايتونو کې يې د خپل فعاليت يادونه وکړه.
دوی د مرکز او ولايتونو په کچه د شهيدانو ورثې او معلولينو په تړاو د شته ستونزو په تړاو د وزارت مشرتابه سره خپلې ستونزې، غوښتنې، انديښنې او وړانديزونه شريک کړل او د حل غوښتنه يې وکړه.
د شهيدانو او معلولينو چارو وزير پوهنمل حميدالله فاروقي د ناستې ګډونوالو د نظرونو او ستونزو تر اوريدو وروسته وويل: چې په افغانستان کې نږدې پنځوس کلنه اوږده جګړه نه يوازې د شهيدانو ورثې او معلوليت لرونکو وګړو د زياتېدو او ستونزو د ډېرېدو سبب شوي؛ بلکه ټول هېواد او هېوادوال یې د کړکيچ تر بحرانه رسولي دي.
دده په خبره، چې د جګړې اوږدوالي او د امکاناتو کمښت د شهيدانو ورثې او معلولينو ستونزې ډیرې کړې دي او وزارت هڅه کوي چې د شته امکاناتو څخه د اعظمي ګټې اخيستنې په ډول د ياد قشر ستونزو ته رسيدنه وکړي او هغوی ته د ژوند اسانتياوې برابرې کړي.
ښاغلي فاروقي په ټولنه کې د مدني بنسټونو او شوراګانو ارزښت ته په کتو، له هغوی څخه د زغم او حوصلې غوښتنه وکړه او دوی يې له وزارت سره ګډکار، همکارۍ او همغږۍ ته را وبلل، څو پر بنسټ يې روڼتيا تامين، د فساد پر وړاندې مبارزه بريالۍ او حق حقدار ته وسپارل شي.
