د شهيدانو او معلولينو په چارو کې د دولت وزير لعل الدين آريوبي د پکتيا له مستوفي سره وليدل
د شهيدانو او معلولينو په چارو کې د دولت وزير لعل الدين آريوبي د پکتيا له مستوفي سره وليدل
نن دوشنبه (۳۱وږې)، د شهيدانو او معلولينو په چارو کې د دولت وزير، لعل الدين آريوبي پکتيا ته د خپل ولايتي سفر په ترڅ کې د پکتيا ولايت له مستوفي سره د شهيدانو او معلولينو د حقوقو او امتيازاتو د ورکړې او بانکي سازۍ په تړاو ناسته وکړه.
په دغه ناسته کې له ښاغلي آريوبي صيب سره د پکتيا محترم والي حليم فدايي او د پکتيا د شهيدانو او معلولينو چارو آمر بختيار ځاځي هم ملتيا کوله.
ښاغلي آريوبي د شهيدانو وارثينو او معلوليت لرونکو وګړو ته د حقوقو او امتيازاتو د ورکولو په برخه کې د اسانتياوو را منځته کولو او بانکي سازۍ په هکله خپل وړاندېزونه، غوښتنې او لارښونې د پکتيا له محترم مستوفي سره شريکې کړې.
د پکتيا مستوفي له ښاغلي لعل الدين آريوبي او مل پلاوي څخه مننه وکړه، چې د پکتيا جګړو ځپلو ولسونو د ستونزو د اورېدو او حل په پار يې دغه ولايت ته سفر کړی او د شهيدانو وارثينو او معلوليت لرونکو وګړو ته د امتيازاتو د ورکړې پروسې بانکي سازۍ بهير د چټکتيا په تړاو يې له خپله اړخه د پوره همکارۍ ډاډ ورکړ او ناسته مازيګر مهال په پای دوعا سره پای ته ورسېده.
