د شهيدانو او معلولينو په چارو کې د دولت وزارت په مشرۍ او کوربتوب د معلوليت ملي ستراتيژۍ د بيا کتنې ورکشاب جوړ شو
د شهيدانو او معلولينو په چارو کې د دولت وزارت په مشرۍ او کوربتوب د معلوليت ملي ستراتيژۍ د بيا کتنې ورکشاب جوړ شو
دغه ورکشاپ کې چې د شهيدانو او معلولينو په چارو کې د دولت وزارت په مشرۍ او د ملګرو ملتونو د ماين پاکۍ د خدمتونو دفتر په تخنيکي مرسته جوړ شوی و، د هېواد د معلولينو استازو، د کورنيو او بهرنيو مرستندويه بنسټونو چارواکو او د وزارت کارکوونکو پکې ګډون درلود.
د شهيدانو او معلولينو په چارو کې د دولت وزارت تخنيکي مرستيالې جميلې نورستانۍ د غونډې په پيل کې د ورکشاپ ګډونوالو ته ښه راغلاست او هرکلی ووايه او خوښي يې څرګنده کړه، چې له نيکه مرغه د شهيدانو او معلولينو په چارو کې د دولت وزارت له نورو اړوندو بنسټونو سره په همکارۍ وتوانيد چې کال وړاندې د لسو کلونو لپاره د معلوليت ملي ستراتيژي جوړه او د پلې کولو لپاره يې لاس په کار شي.
د ملګرو ملتونو د ماين پاکۍ د خدمتونو دفتر استازي ګيټان دی پيپويس، هم د شهيدانو او معلولينو په چارو کې د دولت وزارت او نورو اړونده مرستدويه بنسټونو سره د همغږۍ پر زياتوالي ټينګار وکړ او ژمنه يې وکړه، چې په دې برخه کې به خپلو همکاريو ته دوام ورکوي.
د شهيدانو او معلولينو په چارو کې د دولت وزارت سلاکار حبيب خان ځاځي د ورکشاپ ګډونوالو ته د معلوليت لس کلنې ستراتيژۍ په هکله د سيمينار په ډول هر اړخيز مالومات وړاندې کړل.
د ښاغلي ځاځي د مالوماتو له مخې، چې ددې ستراتيژۍ اصلي موخه داده چې؛ ټول معلوليت لرونکي وګړي بايد زده کړو، معشيت، کار، روغتيا، بيارغونې، رواني-ټولنيز ملاتړ، مصؤنیت، ترانسپورټ، سياسي ګډون، بيړنی بشردوستانه ملاتړ، سپورټ، تفريح او د نورو اتباعو په څېر د ژوند ټولو اسانتياوو ته لاسرسی ولري.
د يادونې وړده، چې ياد ورکشاپ هر درې کاله وروسته دايرېږي، ترڅو اړوندې مسوولې ادارې، د معلولينو استازي او ګډونوال ياده ستراتيژي تر بحث لاندې ونيسي او د اړتيا سره سم پکې بدلون راولي.
