د سمنګانو ولایت د شهیدانو او معلولینو چارو ریاست کې نوی الکټرونیکي سیسټم فعال او ګټې اخیستنې ته وسپارل شو
د شهیدانو او معلولینو چارو وزارت د ډېټابېس او معلوماتو رئیس محترم الله محمد دوست او ورسره مل تخنیکي او مسلکي پلاوي د سمنګانو ولایت د شهیدانو او معلولینو چارو ریاست کې د یتیمانو، کونډو او معلولینو د ثبت او بایومټریک په موخه نوی الکټرونیکي سیسټم فعال او ګټې اخیستنې ته وسپاره.
په همدې موخه په جوړه شوې غونډه کې د سمنګانو ولایت د والي مرستیال محترم الحاج ملا داد خدا خادم، د شهیدانو او معلولینو چارو وزارت د ډېټابېس او معلوماتو د سیسټم رئیس محترم الله محمد دوست، د شهیدانو او معلولینو چارو رئیس محترم قیام الدین خالد او د یاد ولایت ځینو مسؤلینو ګډون کړی وو.
په دې غونډه کې د سمنګانو ولایت د شهیدانو او معلولینو چارو رئیس محترم قیام الدین خالد خبرې وکړې او زیاته یې کړه: په دې ریاست کې د نوي الکټرونیکي سیسټم فعال کیدل دا څرګندوي چې اسلامي امارت او په ځانګړي توګه د شهیدانو او معلولینو چارو وزارت د دې قشر په لاسنېوي کې پوره هلې ځلې کوي او د ولایت د مقام څخه یې یاد قشر ته د استوګنځېو او کاري فرصتونو د برابرولو په برخو کې د لا زیاتې همکارۍ غوښتنه وکړه.
همداراز په دې غونډه کې د شهیدانو او معلولینو چارو وزارت د ډېټابېس او معلوماتو رئیس محترم الله محمد دوست خبرې وکړې او ویې ویل: نړۍ ثانیه په ثانیه د پرمختګ په لور روانه ده او ورځ تر بلي ټول سيسټمونه د الکټرونیکي کېدو او ډیجیټلایز کېدو په لور درومي ترڅو د نورو ګڼو ګټو ترڅنګ چټکتيا، دقت، رونټیا او آسانتيا رامنځته کړي نو په همدې اساس د ډېټابېس او معلوماتو ریاست د شهیدانو او معلولینو چارو وزارت د عمده او اساسي موخو ترلاسه کولو په ترڅ کې دا ځل ویاړ لري چې د یتیمانو، کونډو او معلولینو لپاره نوی الکټرونیکي سیسټم په دې ریاست کې فعال کړي چې په دې ترتیب سره دا سیسټم د هېواد په (۲۶) ولایتونو کې فعال او ګټې اخیستنې ته وسپارل شو.
په ورته وخت کې د سمنګانو ولایت د والي مرستیال محترم الحاج ملا داد خدا خادم خبري وکړي او زیاته یې کړه: الله تعالی هغه کسان ستایلي دي چې د شهیدانو د ورثه ؤ، معلولینو او بېوزلو وګړو لاسنیوی کوي او د شهیدانو او معلولینو چارو وزارت له رهبري څخه یې مننه وکړه چې بې له هر ډول سمتي، قومي او ژبني توپیر او تبعیض پرته د شهیدانو کورنیو او معلولینو ته د خدمت کولو په لړ کې یې له هیڅ راز هلو ځلو درېغ نه دی کړی. هغه همدارنګه د شهیدانو ورثه ؤ او معلولینو ته د خدمتونو وړاندې کولو په ترڅ کې اخلاص او صداقت ته اشاره وکړه او غوښتنه یې وکړه چې ټول کارکوونکي دي په پوره اخلاص او رېښتینولي خپلې چارې پرمخ یوسي.
