د اړیکو مرکز
د شهیدانو اومعلولینو په چارو کې د دولت وزارت د اړیکو مرکز
د اړیکو مرکز د اترا ادارې په همکارۍ په ۱۳۹۸م ه ش کال په پیل کې جوړ او د ۱۳۹۸ه ل کال د چنګاښ د میاشتې په ۱۱مه نیټه په رسمي ډول ګتې اخیستنې ته وسپارل شو.
د شهیدانو ورثې او معلولیت لرونکي وګړي کولی شي، له دې مرکز سره په (۷۱۷) شمېره اړیکه ونیسي او خپلې ستونزې، غوښتنې، اړتیاوې، وړاندیزونه او اندېښنې ورسره شریکې کړي.
په نننۍ عصري ټکنالوژۍ سمبال دا مرکز د یو منظم کاري او مسلکي پرسونل پر مټ د هېوادوالو ټولې اړیکې په سمه او غوره بڼه ځوابوي، د هغوی هر ډول غوښتنې، ستونزې او وړاندیزونه را اخلي او بیا یې له مسوولو چارواکو سره شریکوي، تر څو د شهیدانو وارثینو او معلولیت لرونکو وګړو ستونزو ته پر وخت رسیدنه وشي.
دا مرکز هره ورځ د سهار له اتو بجو نه تر مازیګر څلورو بجو پورې د هېواوالو په خدمت کې دی او نږدې د پنځه سوه هېوادوالو اړیکو ته ځواب ورکوي. د وزارت د هر ډول خدمتونو، لاسته راوړنو، پرمختګونو، عامه پوهاوي، د هغوی د حقونو او امتیازاتو او نورو مهمو مواردو په تړاو ورسره په پوره حوصله مندۍ او لېوالتیا مالومات شریکوي.
یاد مرکز د شهیدانو ورثې او معلولیت لرونکو وګړو لپاره د وزارت خدمتونو، نویو پرمختګونو او فعالیتونو (د بروکراسۍ ختمول، د روڼتیا تامین، زوړ سیسټم په نوي برېښنايي سیسټم بدلول، د شهیدانو او معلولینو د اسنادو بیا څېړل، سمول او ارزول، له یوې واحدې درېڅې د خدمتونو وړاندې کول، د خبري سټډیو جوړول، د اسنادو ارشیف او ډیټابیس کول، په مرکز کابل او ولایتونو کې د بشري سرچینو پر جوړښت بیاکتنه، د کارموندنې، زده کړو، د ظرفیت لوړولو او نور ملاتړو خدمتونو په موخه له دولتي او غیردولتي ادارو سره د هوکړه لیکونو لاسلیک کول او په نورو برخو کې د پاموړ لاسته راوړنو او خدمتونو) څخه د خبروي او هغوی ته د اسانه لاسرسي په موخه جوړ شوی دی.
د وزارت مشرتابه او کارکوونکي هڅه کوي، څو د لرې پرتو سیمو د شهیدانو وارثین او معلولین، کوم چې رسنیو ته لکه، ټلویزیون، سوشیل میډیا، ورځپاڼو او نورو رسنیو ته لاسرسی نه لري، له وزارت سره د همدې مرکز له لارې په اسانۍ سره په اړیکه کې شي او خپلې پوښتنې، اندېښنې، ستونزې، غوښتنې، وړاندیزونه او نظرونه شریک کړي.
په ورته وخت کې د شهیدانو او معلولینو په چارو کې د دولت وزارت مشرتابه د شهیدانو ورثې او معلولیت لرونکو وګړو څخه غواړي، چې د (۱۱۷) شمېرې له لارې له وزارت سره د چارو اړوند مسایل شریک کړي او له همدې لارې د وزارت مشرتابه او مسوول چارواکي له خپلو ستونزو او غوښتنو خبر کړي، ترڅو یې ستونزو، غوښتنو او اندېښنو ته رسیدنه وشي او له خپلو حقونو او امتیازاتو برخمن شي.
د دې مرکز مهمې موخې:
- د شهیدانو ورثه وو او معلولیت لرونکو وګړو پوښتنې، وړاندیزونه، نیوکې، او ستونزې اوریدل او د دوي ستونزو ته په خپل وخت رسیدګي کول.
د اړیکو مرکز کارکوونکي هڅه کوي، چې د شهیدانو ورثې او معلولیت لرونکو وګړو غوښتنې، پوښتنې، نیوکې، ستونزې او وړاندیزونه را ټول کړي او د لازمو اقداماتو لپاره یې له اړوندو چارواکو سره شریکي کړي.
- د وزارت اړوند ریاستونو او ولایتي څانګو څخه د سمو او دقیقو معلوماتو راټولول او د شهیدانو ورثه وو او معلولیت لورونکو وګړو سره شریکول.
یاد مرکز کوښښ کوي چې د شهیدانو او معلولینو په چارو کې د دولت وزارت مرکزي او ولایتي ریاستونو فعالیتونه، معلومات او کاري راپورونه را ټول کړي، څو د پوښتنې او غوښتنې پر مهال یې له مراجعینو سره شریک کړي.
- د شهیدانو د ورثې او معلولیت لرونکو وګړو د حقوقو او امتیازاتو په اړه معلومات ورکول.
د اړیکو مرکز دا مسولیت لري چې د شهیدانو ورثې او معلولیت لرونکو وګړو ته د مرکز سره د اړیکې په صورت کې د حقوقو او امتیازاتو په هکله مکمل معلومات ورکړي او د هغوی قناعت حاصل کړي.
- هر هغه شخص چې د شهیدانو او معلولینو په چارو کې د دولت وزارت څخه د شهادت کتابچه او یا هم د معلولیت کارت ولري نو اړ دي، چې دحقوقو ترلاسه کولو لپاره بریښنایي پيژند پاڼه ترلاسه کړي؛ نو د بریښنایي پيژند پاڼو د ترلاسه کولو په اړه د شهیدانو ورثه وو او معلولیت لرونکو وګړو ته لارښونه او معلومات ورکول.
- د وزارت له لوري د نظامي شهیدانو ورثې ته د کوپون او د نورو مرستندویه خیریه بنسټونو په هکله کوم چې، د وزارت په مشرۍ او همغږۍ په دې برخه کې فعالیت کوي، د لاستیوي او مرستو په اړه معلومات ورکول.
- معلولیت لرونکو وګړو ته د هغو ۵۰۰ کاري بستونو په هکله چې د ملکي خدمتونو او اداري اصلاحاتو لخوا اعلان شوي وو، پوره معلومات ورکول او د نوماندۍ لپاره یې اړینه لارښوونه کول.
- د هېواد بېلا بېلو ولایتونو ته د شهیدانو او معلولینو په چارو کې د دولت وزیر محترم لعل الدین آریوبي او مل هیئت د سفرونو، پرمختګونو او لاسته راوړنو په اړه معلومات ورکول.
- په ولایتونو کې د بانکي سازۍ او د بانکي حسابونو پرانیستلو د پیلېدو پروسې په تړاو مهمې او اړینې سپارښتنې، لارښونې او معلومات ورکول.
- د معلولیت لرونکو وګړو او د شهیدانو ورثې د اسنادو او وثیقو د سمونې او څېړنې کمېټو د کار په اړه معلومات ورکول.
- د جهادي معلولینو د حقوقو او خدماتو په اړه معلومات ورکول.
- د دوو شهیدانو او د یوه وکیل په اړه هر اړخیز معلومات ورکول .
- په مرکز کې د معلولیت درجې د تثبیت د صحي کمېسیون او همدارنګه د څو بعدي کمېسیون په اړه معلومات ورکول.
- د هغه شهید چې یوه ورثه ولري، د حقوقو او امتیازاتو د ورکړې په اړه معلومات ورکول.
- له ۱۳۸۰ کال د وړاندې شهیدانو او معلولینو د حقوقو دورکړې په اړه معلومات ورکول.
- د طبیعي یا غیر جنګي معلولینو د حقوقو د ورکړې په اړه معلومات ورکول.
- د نابینایانو د ځانګړو ښوونځیو د فعالیتونو، خدماتو، او کارونو په اړه معلومات وړاندې کول.
- معلولیت لرونکو وګړو ته د ښاروالۍ له لوري د غرفو د وېشلو په اړه معلومات ورکول.
- د نظامي شهیدانو ورثه وو او نظامي معلولینو ته په مرکز او ولایاتو کې د ځمکې د ویش په اړه معلومات ورکول.
- د هغه معلولیت لرونکو وکړو په اړه چې عمر یې له اتلس کلنۍ څخه کم وي، د حقوقو د ورکړې په اړه معلومات ورکول.
- او همدارنګه د هغو ټولو هوکړه لیکونو په تړاو چې د شهیدانو او معلولینو په چارو کې د دولت له لوري، د هېواد له بېلا بېلو تعلیمي بنسټونو او تحصیلي موسسو سره د شهیدانو ورثې او معلولینو لپاره د مناسبو او غوره زده کړو د زمینو برابرولو په موخه لاسلیک شوې دي، مراجعینو (اړیکو نیوونکو) ته پوره او هر اړخیز معلومات ورکول.
د شهيدانو او معلولينو په چارو کې د دولت وزارت د اړيکو مرکز ته د ۷۱۷ شمېرې له لارې، ټولې راغلې اړيکې ځوابيږي او د هېڅ هېوادوال نه اړيکه بې ځوابه پاتې کيږي او نه يې ستونزه او شکايت بې پوښتنې پاتې کيږي.
د معززو معلولينو او د شهيدانو وارثينو هره اړيکه، د شمېرې، وخت، تاريخ او غږ سره ثبتيږي، رسيدګي ورته کيږي، درجه بندي کيږي او راپور يې له مقاماتو او ملت سره شريک کيږي.
دولت او په ځانګړي ډول دغه وزارت خپلو هېوادوالو او مراجعينو ته په خدمت او اسانتيا برابرولو مکلف دی.
لاندې ارقام د اړيکو مرکز له رسمي پرانستې وړاندې د يوې لنډې مودې دي.
له دې وروسته به وخت پر وخت په منظم ډول د اړيکو د مرکز فعاليتونه او کاري راپورونه، د قدرمن وزير لعل اريوبي صيب د هدايت له مخې، تاسو سره شريک شي.
درنښت
