په نیمروز ولایت کې څه باندې (۲) میلیونه او (۸۰۰) زره افغانۍ پر مستحقو کسانو ووېشل شوې
د نیمروز ولایت والي محترم الحاج مولوي عبدالمنان محمود د ژور احساس او د مدبرانه نوښت له مخې د ژمي له رارسېدو سره سم، د شهیدانو وارثینو، معلولینو او یتیمانو ته د نقدي مرستو د وېش یو پروګرام پیل شو، چې په ترڅ کې د شهیدانو او معلولینو چارو رياست سره په همغږۍ د شهیدانو پر (۲۷۸) مستحقو کورنيو او پر (۱۱۰) تنو معلولینو باندې (۲) میلیونه، (۶۵۴) زره او (۴۰۰) افغانۍ په منظم او عادلانه ډول ووېشل شوې.
همداراز د دلارام ولسوالۍ اړوند د حضرت سيد الشهداء حمزه رضي الله عنه دارالایتام پر (۲۸۵) تنو مستحقو یتیمانو سره هم د (۲) لکه افغانيو نغدي مرسته ترسره شوه.
د مرستو د وېش پر مهال د نیمروز ولایت والي محترم الحاج مولوي عبدالمنان محمود د شهیدانو او معلولینو د ارزښتناکو قربانيو يادونه وکړه او زياته يې کړه د شهیدانو وارثین، معلولین او یتیمان زموږ د ټولنې هغه سپېڅلي او درانه قشرونه دي چې د هېواد د ازادۍ، عزت او تلپاتې امنیت په لاره کې یې سترې قربانۍ ورکړي دي. د هغوی پالنه، لاسنیوی او درناوی زموږ دیني، انساني او ملي وجیبه ده او ډاډ یې ورکړ چې د مرستو دا لړۍ به، د الله تعالی جل جلاله په توفیق، په منظم او دوامداره ډول روانه وي.
همداراز د شهیدانو او معلولینو چارو رئیس محترم مولوي میراحمد منیر د مرستو د وېش په بهیر کې د بشپړ شفافیت ډاډ ورکړ او له ټولو شتمنو هېوادوالو او خیریه بنسټونو یې وغوښتل چې په دې ساړه ژمي کې د یتیمانو، معلولینو او د شهیدانو د وارثینو لاسنیوی وکړي، څو وکولای شي د ژوند ستونزو سره په ښه توګه مقابله وکړي او دا نېک او خیرخواهانه عمل به، بې له شکه، د دنیا د سوکالۍ او د آخرت د نجات سبب وګرځي.
