د سالنګ تونل د اسلامي امارت د ریاست الوزراء اقتصادي مرستیال محترم ملا عبدالغني برادر اخند له خوا د بیارغونې وروسته پرانیستل شو
د سالنګ لویې لارې تونل د اسلامي امارت د ریاست الوزراء اقتصادي مرستیال محترم ملا عبدالغني برادر اخند له خوا د بیا رغونې وروسته د موټرو پر مخ پرانیستل شو.
په هغه مراسمو کې چې په همدې موخه د بغلان ولایت په شمالي سالنګ کې جوړ شوي وو، د اسلامي امارت د ریاست الوزراء اقتصادي مرستیال محترم ملا عبدالغني برادر اخند، د ټولګټو چارو سرپرست وزیر محترم ملا محمد عیسی ثاني، د شهیدانو او معلولینو چارو سرپرست وزیر محترم الحاج ملا عبدالمجید اخند او د اسلامي امارت یو شمېر لوړ پوړو چارواکو ګډون کړی وو.
په همدې موخه په جوړ شوي مراسمو کې د اسلامي امارت د ریاست الوزراء اقتصادي مرستیال محترم ملا عبدالغني برادر اخند خبرې وکړې او زیاته یې کړه: یو ملت په اقتصادي لحاظ هغه مهال پر پښو دریږي او د خود کفایۍ پر لور ګامونه اخلي کله چې سالمه زیربنا ولري، زمونږ د هېواد زیربنا د تېرو څلویښتو کلونو د جګړو له امله سخته صدمه لیدلې ده، د اقتصاد د اساساتو رغولو اهمیت اسلامي امارت درک کړی دی، ځکه یې د اقتصادی پالیسۍ مهمه برخه ګرځیدلې ده.
هغه همداراز په وخت او ښه کیفیت سره د سالنګ لویې لارې د تونل او (۱۶) مې ګالري د اساسي بیارغونې له امله د ټولګټو وزارت، قراردادي خصوصي شرکتونو او انجنیرانو له مخلصانه هڅو څخه مننه وکړه.
نوموړي همداراز وویل: اسلامي امارت په پوره اخلاص او صداقت سره د هېواد د آبادۍ لپاره هڅې کوي او ټولې کړې ژمنې به په عمل کې ثابتې کړي، ټول ملت باید د اسلامي امارت څخه په کلکه ملاتړ وکړي.
