د شهیدانو او معلولینو چارو وزارت یو شمېر یتیمانو، کونډو او معلولینو ته د ژمنیو توکو چمتو کولو په موخه د احساس خیریه مؤسسې سره هوکړه لیک لاسلیک کړ
د همکارۍ دغه هوکړه لیک د شهیدانو او معلولینو چارو وزارت د بهرنيو اړیکو او پلان رئیس محترم ملا صدو خان حق شناس او د احساس خیریه مؤسسې د استازي محترم محمد اسحاق صافي تر منځ لاسلیک شو، چې د هغه پر اساس به د کابل ولایت اړوند (۱۰۵) تنو یتیمانو، کونډو او معلولینو ته ژمنې مرستې چمتو او ووېشل شي او په دې ترتیب به هر مستحق د سوند توکي، بخارۍ او کمپلۍ ترلاسه کړي.
د یادونې وړ ده چې د یادې پروژې ټولیز لګښت لس زره (۱۰۰۰۰) امریکایي ډالره کېږي او د تطبیق چارې به یې د کابل ولایت د شهیدانو او معلولینو چارو ریاست سره په همغږۍ پر مخ یوړل شي.
