د معلولیت په برخه کې له همکارو مؤسيسو سره د همغږۍ غونډه وشوه

پنج‌شنبه د 1400لمريز کال د چنګاښ لسمه نېټه

 د معلولیت د چارو په برخه کې د وزارت او د همکارو مؤسيسو (DSCG) ترمنځ د همغږۍ آنلاین ناسته د ښاغلي پوهنمل حمیدالله فاروقي( د شهیدانو او معلولینو چارو وزارت سرپرست او نامزد وزير ) په مشرۍ ترسره وشوه. په دې ناسته کې، په بیلابیلو برخو کې د همغږۍ او ګډې همکارۍ د پیاوړتیا په اړه خبرې وشوې، په ځانګړي توګه د مشورتي بورډ په جوړولو او همداراز د ولسمشرۍ د عالي مقام رياست تر منظورۍ وروسته د معلولیت ستراتیژۍ د نهایی کولو او پلي کولو په هکله خبرې وشوې او په اړه یې نظریات شریک شول. په دې ناسته کې د معلولیت په برخه کې, همکارو مؤسسو د شهیدانو او معلولینو وزارت له رهبرۍ سره د خپل فعاليتونو د پرمختګ راپور شریک کړ.

 د غونډې په پیل کې، د دیمک مؤسسې د قربانیانو مسؤل ښاغلي حبیب خان ځاځی د معلولیت ملي ستراتیژۍ، دمعلولیت ملي ډیټابیس او د ماینونو د بندولو تړون د بین القاره اي د ناستو مجلس د پرمختګ په اړه خپل راپور د شهبدانو او معلولینو چارو له سرپرست وزیر سره شریک کړ.

وروسته بیا د (DSCG) همکارو مؤسسو نورو استازو د شهیدانو او معلولینو چارو وزارت سرپرست ته د خپلو فعالیتونو د پرمختګ راپور وړاندې کړ او په لا همغږي او همکارۍ یې ژمڼه او ټینګار وکړ. ورپسې د شهیدانو او معلولینو چارو وزارت سرپرست ښاغلي پوهنمل حمیدالله فاروقي د همکارو مؤسيسو د همکاریو او هڅو څخه مننه وکړه او یادونه یې وکړه چې د معلولیت ملي ستراتیژي تر ټولو مهم سند دی چې د لسو کلونو لپاره د وزارت د فعالیتونو اصلي کرښې ښیي او پکښې د معلولیت لرونکو خلکو ټولې اړتیاوې په پام کې نیول شوي دي. هغه پر همکارو مؤسيسو او نورو نړیوالو بنسټونو غږ وکړ چې په دې برخه کې د شهیدانو او معلولینو چارو وزارت سره جدي همکاري وکړي. ښاغلي فاروقي ټینګار وکړ چې د فعالیتونو د لا اغيزمن کیدو لپاره باید ټولې همکارې مؤسسې په میاشت کې یو ځل خپلې غونډې وکړي او خپل کاري راپورونه دې وزارت سره د څلور مياشني، شپږ میاشتني او کلني په اساس شریک کړي.

 ښاغلي فاروقي د شهیدانو وارثینو او معلولینو لپاره د مشورتي بورډ پر جوړولو هم ټینګار وکړ او په دې برخه کې یې د پرمختګ یادونه هم وکړه. په پای کې، د شهیدانو او معلولینو چارو وزارت سرپرست په دې آنلاین ناسته کې له ټولو برخه والو وغوښتل چې د مطلوب پایلې د ترلاسه کولو لپاره د همغږۍ او همکارۍ د پیاوړتیا لپاره ګډ کار وکړي.