د پکتیا ولایت په زرمت ولسوالۍ کې پر یتیمانو باندې مرستې وویشل شوې
په هغه پروګرام کې چې په همدې موخه د پکتیا ولایت د زرمت ولسوالۍ په خاتم الانبیآء دارالأیتام او مدرسې په انګړ کې جوړ شوی وو، په هغه کې د اوبو او انرژۍ وزارت سرپرست وزیر ښاغلي ملاعبدالطیف منصور، د اسلامي امارت ځلانده ستوري شیخ الحدیث ښاغلي عبدالحمید حماسی، د پکتیا ولايت د شهیدانو او معلولینو چارو رئیس ښاغلي مولوي محمد نبي محمدي او همداراز د ترکيې خیریه بنسټ استازو ګډون کړی وو.
د یاد پروګرام په ترڅ کې د اوبو او انرژۍ وزارت سرپرست وزیر ښاغلي ملاعبدالطیف منصور د ياد دارالأیتام په زده کوونکو باندې د لوی اختر د رارسیدو په مناسبت اختریزې ډالې، همداراز د ترکیې خیریه بنسټ له لوري پر یو سل او شل (۱۲۰) تنه زده کوونکو باندې (۴۲۷۰۰۰)څلورلکه او اوه ویشت زره افغانۍ نغدي مرستې وویشل شوې.
په ياد پروګرام کې ښاغلي شیخ الحدیث عبدالحمید حماسي هم د پروګرام ګډونوالو ته په زړه پورې وینا وکړه او پروګرام د ښاغلي ملاعبدالطیف منصور په دعائیه پای ته ورسید.
