د معلولیت ملي ستراتېژۍ د نهایي کولو وروستۍ غونډه ترسره شوه
د معلولیت ملي ستراتېژۍ د نهایي کولو وروستۍ غونډه ترسره شوه
د شهیدانو او معلولینو چارو وزارت د معلولیت ملي ستراتېژۍ د نهایي کولو په لړ کې دولتي ادارو سره خپله وروستۍ غونډه ترسره کړه، چې د بهرنیو چارو وزارت، مالیې وزارت، چارو ادارې، ځمکو او ښار جوړولو وزارت، سیمه ییزو ارګانونو خپلواکې ادارې، کرهڼې، اوبو لګولو او مالدارۍ وزارت، پېښو ته د رسیدګۍ په چارو کې د دولت وزارت او د احصایې او معلوماتو ادارې استازو پکې ګډون درلود.
په پیل کې د شهیدانو او معلولینو چارو سرپرست وزیر پوهنمل حمید الله فاروقي د یادو ادارو استازو ته ښه راغلاست ووایه او د ستراتېژۍ په نهایي کولو کې یې د جمهور رییس د لارښوونو پر بنسټ د دوی نظرونه، همکاري او همغږي وستایله.
ښاغلي فاروقي معلولیت په هېواد کې د اوږدې جګړې لامل وګڼه وویل، چې معلولیت یوه ملي مسله او ستونزه ده، چې د یوې ادارې له لوري ورته رسیدګي ستونزمنه ده. اړینه ده، چې ټولې ادارې د خپلو کاري برخو اړوند دغه قشر ته خدمتونه وړاندې کړي. زیاته یې کړه، چې دغه سند د ټولو ادارو د نظرونو پر بنسټ جوړ شوی او په ټوله کې یو افغاني ملي سند ته چې په هېواد کې د معلولیت ستونزې د ښه تشخیص له مخې رامنځته شوي او په دې کې د ټولو ادارو همکاري او همغږي د ستاینې او مننې وړ ده.
ښاغلي فاروقي د ستراتېژۍ د نهايي کولو او مختلفو ادارو د نظرونو اخیستو په وروستۍ ناسته کې د دا ډول غونډو دوام اړین وباله او وړاندیز یې وکړ، چې د ستراتېژي اړوند ټول نظرونه په لیکلې بڼه ترتیب شي، معلومات د خپلې ادارې مشرتابه سره شریک او د همغږۍ او تطبیق برخه کې هر اړخیزه همکاري وکړي.
د ستراتېژۍ د موخو، اړتیاوو، اساساتو او منځپانګې په اړه ښاغلي حبیب خان ځاځي د غونډې کډونوالو ته معلومات وړاندې کړه او د دې ستراتېژۍ نهایي کېدل او تطبیق یې مهم وګڼه.
د یادو ادارو مسولینو هم د دې ستراتېژۍ د غني او بشپړولو په موخه خپل نظرونه وړاندې کړه او د تطبیق په اړه یې ډاډ ورکړ.
د یادونې وړ ده، چې د معلولیت ملي ستراتېژۍ د پیاوړتیا او نهايي کولو په اړه ټولو دولتي ادارو سره ناستې ترسره شوې او نن یې وروسته هغه وه. له دې وروسته به د ټولو ادارو نظرونه په ستراتېژۍ کې شامل او د جمهوري ریاست عالي مقام سره به شریکه شي. د یاد مقام له تاییدۍ او لارښوونو وروسته به یې د ټولو ادارو په همکارۍ او همغږۍ د تطبیق عملي چارې پیل شي.
