د معلولينو نړيوالې ورځې د نمانځلو اصلي موخه د معلوليت لرونکو وګړو ستونزو ته رسيدنه ده
د معلولينو نړيوالې ورځې د نمانځلو اصلي موخه د معلوليت لرونکو وګړو ستونزو ته رسيدنه ده
نن د ليندۍ په ۱۲مه، د افغانستان د معلولينو سرتاسري شورا غړو او د نظامي معلولينو استازو په جلا جلا ناستو کې د شهيدانو او معلولينو په چارو کې د دولت وزير لعل الدين آريوبي سره وليدل
دوی ټولو په وزارت کې پر روانو اصلاحاتو خوښي وښوده او په چارو کې د روڼتيا په رامنځته کيدو برخه کې يې له ښاغلي آريوبي څخه د خپل ملاتړ پر دوام ټينګار وکړ.
همدارنګه دوی له ښاغلي آريوبي سره د ملکي او نظامي معلولينو د حقونو د ځنډ، بې کارۍ، روغتيا، بيارغونې، زدکړو او د قوانينو د تعديل په برخو کې خپلې ستونزې او وړانديزونه شريک کړل.
د شهيدانو او معلولينو په چارو کې دولت وزير لعل الدين آريوبي دوی ته د ډسمبر درېيمې، چې د معلولينو نړيوالې ورځې سره سمون خوري مبارکي وويله او زياته يې کړه، چې ددې ورځې د رامنځته کېدو اصلي فلسفه د معلوليت لرونکو وګړو ستونزو ته رسيدنه ده او هغوی ته د خدماتو بهترول دي.
ښاغلي آريوبي ژمنه وکړه، چې سبا (پنجشنبه) د کابيني په ناسته کې به، چې جمهور رئيس د معلولينو نړيوالې ورځې په وياړ جوړه کړې ده، له ولسمشر سره د معلولينو ستونزو ته د لا ښې رسيدنې په موخه د معلولينو مهمې ستونزې او وړانديزونه شريک کړي او په دې برخه کې به ترينه د لا زياتو اسانتياوو غوښتونکی شي.
د ښاغلي آريوبي په خبره، چې د معلولينو نړيواله ورځ به چې څه ډول د افغان معلولينو غوښتنه وي، په همغه ډول نمانځل کېږي، څو په افغاني ټولنه کې د معلولينو پر وړاندې د غوره عامه پوهاوي سبب وګرځي.
ښاغلي آريوبي څرګنده کړه، چې د معلولينو او شهيدانو ورثې ستونزو ته رسيدنه يې لومړيتوب دی کوم چې، دوامداره او اغيزمن کار يې دې هدف ته رسولای شي.
