د شهیدانو او معلولینو چارو وزیر محترم الحاج ملا عبدالمجید آخند د کار او ټولنیزو چارو وزارت له مرستیال سره وکتل
د شهیدانو او معلولینو چارو وزیر محترم الحاج ملا عبدالمجید آخند د کار او ټولنیزو چارو وزارت له مرستیال محترم الحاج مولوي محمد زاهد او راغلي پلاوي سره په خپل کاري دفتر کې وکتل، د دې لیدنې پر مهال د مالي او اداري چارو عمومي رئيس محترم مولوي کلیم الله افغان، د دفتر رئیس محترم مولوي شاه محمد دوست، د بهرنیو اړیکو، پلان او تقنین چارو رئیس محترم مولوي ثناء الله فرقاني او د شهیدانو ورثه وو او معلولینو د پالنې مرکز رئیس محترم مولوي احسان الله حقاني هم حضور درلود.
په پیل کې محترم وزیر صاحب د شهیدانو ورثه وو، معلولینو او د معلولیت لرونکو وګړو د اولادونو لپاره د حرفوي او مسلکي زده کړو د برابرولو پر ارزښت او اړتیا خبرې وکړې او د هغوی د اقتصادي ځان بسیاینې لپاره یې یو مهم ګام وباله.
ورپسې د کار او ټولنیزو چارو وزارت مرستیال د عالیقدر امیرالمؤمنین حفظهالله تعالی هغه ځانګړی حکم له محترم وزیر صاحب سره شریک کړ، چې پکې د معلولینو لپاره د فني او حرفوي زده کړو د زمینې برابرولو واضح هدایت شوی وو.
د هر اړخیزو بحثونو او نظریاتو له تبادلې وروسته، د محترم وزير صاحب له لوري هدايت وشو، چې د دواړو وزارتونو له لوري دې یوه باصلاحیته ګډه کمېټه وټاکل شي، تر څو د معلولینو لپاره د حرفوي زده کړو د میکانیزم، څرنګوالي او د تطبیقي لارو چارو په هکله یو منظم طرزالعمل ترتیب کړي او وروسته یې د عالیقدر مشرتابه حفظه الله تعالی دفتر ته وړاندې کړي.
