د شهیدانو او معلولینو چارو وزارت کې د کاري ظرفیت لوړونې پروګرامونو (۲۲) تنو فارغانو ته د تصدیق پاڼو وېش او د یو شمېر نورو کارکوونکو لپاره د نوي زده کړه ئیزو پروګرامونو پېل
د شهیدانو او معلولینو چارو وزارت د کارکوونکو چارو ریاست له لوري د دې وزارت اړوند (۲۲) تنو کارکوونکو ته د ظرفیت لوړولو او د اداري چارو د ښه پرمخ وړلو په موخه د کمپیوټر او انګلیسي ژبې درې میاشتني روزنیز پروګرامونه په لاره اچول شوي وو، چې د وزارت له بېلابېلو برخو څخه کارکوونکو په دې پروګرامونو کې ګډون کړی وو. هغوی ته نن د یو پروګرام ترڅ کې تصدیق پاڼې ووېشل شوې او همداراز د (۲۰) تنو نورو کارکوونکو لپاره ورته نوي زده کړه ئیز پروګرامونه پيل شول.
د دې ښوونیزو پروګرامونو د دایرولو اصلي موخه د کارکوونکو د مسلکي مهارتونو لوړول، په اداري چارو کې د شته ستونزو له منځه وړل او د شهیدانو ورثه وو او معلولینو لپاره د خدمتونو وړاندې کولو د بهیر چټک کول دي.
په همدې موخه جوړ شوي پروګرام کې د مالي او اداري چارو عمومي رئیس محترم مولوي کلیم الله افغان، د دفتر رئیس محترم مولوي شاه محمد دوست، د کارکوونکو چارو رئیس محترم مولوي محمد موسی صدیقي، د اطلاعاتو او عامه اړیکو رئیس محترم مفتي فیصل خاموش او د اړوند ریاست آمرینو حضور درلود.
محترم مولوي کلیم الله افغان په دې مراسمو کې د ټکنالوژۍ د اهمیت په هکله مفصلې خبرې وکړې او وې ویل چې کمپیوټر نن ورځ د یوې ضروري وسیلې په توګه، د معاصرې نړۍ په چټکو پر مختګونو کې مهم رول لوبولی دی او د کمپیوټر څخه سمه او مؤثره استفاده نه یوازې د اداري او تخنیکي چارو د چټکتیا لامل ګرځي، بلکې د وخت، امکاناتو او بېځایه لګښتونو د مخنیوي سبب هم کېږي، هغه همداراز ګډونوال وهڅول چې له کسب شویو مهارتونو څخه اعظمي ګټه پورته کړي او د خپلو مهارتونو د لوړولو لپاره نورې هڅې هم وکړي.
د دې پروګرام په ترڅ کې د کارکوونکو چارو رئیس محترم مولوي محمد موسی صدیقي د کمپیوټري مهارتونو د زده کړې اهمیت ته اشاره وکړه او ویې ویل چې د دې مهارتونو زده کړه د هر کارکوونکي اړینه اړتیا ده او پرته له دې مهارتونو څخه، اداري چارې په مؤثر ډول نه ترسره کېږي، نوموړي له نویو ګډونوالو څخه وغوښتل چې دا روزنیز پروګرام په بشپړې پاملرنې او جدیت سره تعقیب کړي او له دې برابر شوي فرصت څخه په ښه ډول استفاده وکړي، ترڅو خپلې کاري وړتیاوې لا پیاوړې کړي.
د یادونې وړ ده چې د کارکوونکو چارو ریاست نه یوازې د وزارت دننه د کارکوونکو د ظرفیت لوړولو لپاره روزنیز پروګرامونه تنظیم کړي، بلکې د وزارت ګڼ شمېر کارکوونکي یې د کاري مهارتونو د زده کولو په موخه د ملکي خدمتونو انسټیټوټ او نورو اړوندو روزنیزو مرکزونو ته هم معرفي کړي دي او د دې ډول پروګرامونو په پلي کېدو سره به شهیدانو ورثه وو او معلولینو ته خدمتونه پر وخت، دقیق او معیاري ډول وړاندې شي.
