د شهیدانو او معلولینو چارو وزارت د یتیمانو، کونډو او معلولینو لپاره د اسانتیاوو رامنځته کولو په موخه د څه باندې پنځه میلیونه افغانېو په ارزښت د(HHRD) خیریه مؤسسې سره هوکړه لیک لاسلیک کړ
د همکارۍ دغه هوکړه لیک د شهیدانو او معلولینو چارو وزارت د پلان، پالیسۍ او بهرنيو اړیکو رئیس محترم ملا صدوخان حق شناس او د (HHRD) خیریه مؤسسې سوپروایزر محترم عبیدالله احمدي ترمنځ لاسلیک شو، چې د هغه پر اساس به (۴۴۰) تنو یتیمانو، کونډو او معلولیت لرونکو وګړو لپاره په ننګرهار، بدخشان، هلمند، لغمان او تخار ولایتونو کې غرفه لرونکې لاسي کراچۍ، په کراچېو کې د خرڅلاو لپاره توکي او سولرونه چمتو او ووېشل شي.
د دې پروژې د تطبیق مجموعي لګښت (۵) میلیونه او (۱۴۳) زره او (۵۲۸) افغانۍ کېږي چې د دوه میاشتو په موده کې به د پورته ذکر شويو ولایتونو د شهیدانو او معلولینو چارو ریاستونو سره په همغږۍ پلي شي.
