د شهیدانو او معلولینو چارو وزارت د یتیمانو، کونډو او معلولیت لرونکو وګړو څخه د ملاتړ او هغوی سره د مرستو په موخه د عبدالله اید مؤسسې سره دوه هوکړه لیکونه لاسلیک کړل
یاد هوکړه لیکونه د شهیدانو او معلولینو چارو وزارت د بهرنېو اړیکو او پلان رئیس محترم ملا صدوخان حق شناس او د عبدالله اید مؤسسې مرستیال محترم عبدالصمد اسحق زي تر منځ لاسلیک شول چې د یوه هوکړه لیک له مخې به په کابل ولایت کې پنځوس(۵۰) تنو معلولیت لرونکو وګړو ته ويلچيرونه ووېشل شي.
همداراز د دویم هوکړه لیک له مخې به په خوست ولایت کې پنځه سوه (۵۰۰) تنو یتیمانو، کونډو او معلولینو ته خوراکي توکي چې په هغه کې اوړه، وریجې، غوړي شامل دي پر مستحقو کسانو وویشل شي.
د شهیدانو او معلولینو چارو وزارت د بهرنېو اړیکو او پلان رئیس محترم ملا صدوخان حق شناس د یادو هوکړه لیکونو د لاسلیک پرمهال د یادې مؤسسې له مرستو څخه د مننې په ترڅ کې وویل: "یتیمان، کونډې او معلولین د ټولنې تر ټولو زیات اړمن قشر دی هڅه مو دا ده چې د خیریه بنسټونو او مؤسسو په همکارۍ هغوی ته لا ډیرې مرستې راجلب کړو."
د يادونې وړ ده، چې د يادو شویو پروژو ټوليز ارزښت پنځه دیرش زره او څلورسوه او اته ویشت (۳۵۴۲۸)امريکايي ډالره دى، چې هره يوه به يې د یوې میاشتې په موده کې بشپړه شي.
