د شهیدانو او معلولینو چارو وزارت تخنیکي پلاوي د نوي برېښنایي سیسټم له چارو څخه په هرات ولايت کې څارنه ترسره کړه
د شهیدانو او معلولینو چارو وزارت د ډېټابېس او معلوماتو د سیسټم آمر محترم سید تمیم آغا په مشرۍ یو تخنیکي پلاوي چې محترم صدیق الله جهاني، محترم حکمت الله بدري او محترم منیر احمد شیرزي یې ملتیا کوله، په هرات ولایت کې د یتیمانو، کونډو او معلولینو اړوند د نوي برېښنایي سیسټم د چارو څخه هر اړخیزه څارنه او ارزونه ترسره کړه.
د دې څارنې په ترڅ کې، تخنیکي پلاوي د برېښنایي حکومتولۍ په ارزښت او اهمیت خبرې وکړې او د الکټرونیکي سیسټم د چارو د ښه مدیریت او پر مختګ په موخه یې کارکوونکو ته ګټورې سپارښتنې وړاندې کړې.
همداراز، د هرات ولایت د شهیدانو او معلولینو چارو رئیس د یتیمانو، کونډو او معلولینو د ثبت پروسې په برخه کې د تخنیکي ټیم لخوا د ورکړل شویو لارښوونو د عملي کیدو په پار ډاډ ورکړ.
