د جوزجان ولایت د شهیدانو او معلولینو چارو ریاست له لوري د ترسره شویو کړنو او فعالیتونو څخه هر اړخیزه ارزونه ترسره شوه
د شهیدانو او معلولینو چارو وزارت د څارنې او ارزونې رئیس محترم محمد صابر ځواک په مشرۍ پلاوي چې د مرکز او ولایتونو د راپورونو د توحید او تحلیل آمر محترم مولانا نورالدین صاحبزاده او د یاد ریاست کارکوونکي محترم خیبر شېرزاد یې ملتیا کوله، جوزجان ولایت ته یې د سفر پر مهال د شهیدانو او معلولینو چارو ریاست له لوري ترسره شوي فعالیتونه او کړنې له نږدې وارزولې.
یاد پلاوي د شهیدانو ورثه وو او معلولیت لرونکو وګړو ته د خدمتونو وړاندې کولو څرنګوالی، د ځانګړې شوې بودیجې د مصرفولو، د یتیمانو، کونډو او معلولینو د تثبیت او ثبت پروسه او له اداري چارو څخه په هر اړخیز ډول ارزونه ترسره کړه، په یادو برخو کې شته ستونزې او نیمګړتیاوې په نښه او د رسیدګي په موخه یې اړوند کارکوونکو ته لازمې سپارښتنې وشوې.
د یادونې وړ ده چې د شهیدانو او معلولینو چارو وزارت د څارنې او ارزونې پلاوي تر وړاندې هم د هېواد په بېلابېلو ولایتونو کې د شهیدانو او معلولینو چارو ریاستونو له لوري ترسره شوي فعالیتونه او کړنې له نږدې ارزولې وې.
