د شهیدانو او معلولینو چارو وزیر محترم الحاج ملا عبدالمجید آخند بادغیس ولایت ته سفر وکړ
د شهیدانو او معلولینو چارو وزیر محترم الحاج ملا عبدالمجید آخند چې د دعوت او ارشاد رئیس محترم مفتي عبدالاحد مسعود، د مالي او حسابي چارو رئيس محترم مولوي محمد امین دروېش، د ټولنیزو خدمتونو د تنظیم ریاست آمر محترم ملا ابراهیم شاه خلیل او د وزارت مقام سکرتر محترم حافظ نورمحمد یې ملتیا کوله، په نیمروز او فراه ولایتونو کې د مجردو شهیدانو کورنیو او معلولیت لرونکو وګړو سره د لیدنې، د هغوی پوښتنې او د نغدي مرستو د ترسره کولو وروسته، نن بادغیس ولایت ته سفر وکړ.
محترم الحاج ملا عبدالمجید آخند د بادغیس ولایت د شهیدانو او معلولینو چارو په ریاست کې د مجردو شهیدانو کورنیو سره له نږدې ولیدل، د هغوی اړتیاوې او ستونزې یې واوریدې او ورسره یې یو اندازه نغدي مرستې ترسره کړې.
محترم الحاج ملا عبدالمجید آخند د بادغیس ولایت له پخواني والي محترم الحاج ملا محمد حنیف حمزه سره وکتل، په دې لیدنه کې د یتیمانو، کونډو او معلولیت لرونکو کسانو د وضعیت د ښه والي په اړه خبرې وشوې.
همداراز محترم مفتي عبدالاحد مسعود یاد ولایت ته د شهیدانو او معلولینو چارو محترم وزیر د سفر اصلي موخه، د عالیقدر امیر المؤمنین حفظه الله تعالی له لورې د مجردو شهیدانو کورنیو لپاره د ځانګړې شوې تحفې سپارل، له نږدې د هغوی احوال اخیستل وبلل، هغه همداراز د قرآن عظیم الشان او د نبوي صلي الله علیه وسلم د مبارکو احادیثو په رڼا کې د شهادت پر فضلیت خبرې وکړې او ټینګار یې وکړ چې اسلامي امارت د شهیدانو ورثه او معلولین هېڅ وخت نه هېروي او هغوی ته ځانګړې پاملرنه لري.
د بادغیس ولایت د شهیدانو او معلولینو چارو رئيس محترم مولوي محمد اسماعیل رحماني هم د محترم وزیر صاحب هرکلی وکړ. د وزیر صاحب سفر یې د شهیدانو کورنیو او معلولینو د لاسنیوي او پوښتنې په برخه کې د اسلامي امارت د بشپړې پاملرنې نښه وبلله.
