د شهیدانو او معلولینو چارو وزارت د کارکوونکو د کاري وړتیا د لوړولو په موخه زدهکړه ییزه اړتیا سنجونه ترسره شوه
د شهیدانو او معلولینو چارو وزارت د کارکوونکو چارو ریاست اړوند کارکوونکو لپاره د اداري اصلاحاتو او ملکي خدمتونو ادارې له لوري، د فورمو په وېشلو سره زدهکړه ییزه اړتیا سنجونه ترسره شوه، په همدې موخه جوړه شوې غونډه کې د کارکوونکو د چارو رئیس محترم مولوي محمد موسی صدیقي، د اداري اصلاحاتو او ملکي خدمتونو ادارې محترم پلاوي، د دې وزارت د استخدام آمر محترم مولوي عبدالصمد حماد، د سوانحو او ارزونې آمر محترم کریم الله فاروقي، د ادارې پراختیا او ظرفیت لوړولو آمر محترم عزیز احمد احمدي او د یاد ریاست کارکوونکو شتون درلود.
د دې پروګرام اصلي موخه دا وه چې د کارکوونکو زدهکړه ییزې اړتیاوې وپېژندل شي، د هغوی د مسلکي مهارتونو کچه وارزول شي، همدارنګه د ادارې هغه برخې چې پکې کمزورتیا یا خلا شتون ولري، په دقیق ډول تشخیص او د دې اړتیا سنجونې پر بنسټ به اړین روزنیز پروګرامونه ترتیب او تطبیق شي، تر څو د کارکوونکو مسلکي او مهارتي وړتیاوې لوړې او د اداري سیستم مؤثریت نور هم زیات شي.
په دې غونډه کې محترم مولوي محمد موسی صدیقي د هیواد د تېرو جګړو له امله د اداري جوړښتونو د زیانمن کېدو یادونه وکړه او څرګنده یې کړه چې د ظرفیت لوړونې دا ډول پروګرامونه د اداري چارو د اصلاح، د کارکوونکو د مسلکي مهارتونو د پیاوړتیا او مراجعینو ته د باکیفیته خدمتونو د وړاندې کولو په برخه کې ډیر ارزښتناک دي او د اداري اصلاحاتو او ملکي خدمتونو ادارې له محترم پلاوي یې غوښتنه وکړه چې دا لړۍ لا پراخه کړي تر څو یو فعال او ځواب ویونکی اداري سیسټم رامنځته شي.
