د شهیدانو او معلولینو چارو وزارت مرستیال د بامیانو ولایت په کهمرد ولسوالۍ کې د یو شمېر شهیدانو کورنیو سره له نږدې وکتل
د شهیدانو او معلولینو چارو وزارت مرستیال ښاغلي شیخ صاحب عبدالحکیم حقاني چې د یاد وزارت د اطلاعاتو او عامه اړیکو رئیس ښاغلی مفتي فیصل خاموش یې ملتيا کوله، بامیانو ولایت ته د سفر په ترڅ کې د یاد ولایت د شهیدانو او معلولینو چارو ریاست څخه د لیدنې ترڅنګ د دغه ولايت د کهمرد ولسوالۍ په کليچ کلي کې د شهيدانو له يو شمېر وارثينو سره له نږدې وکتل، ستونزې يې واوريدې او له هغوی سره یې یوه اندازه نغدي مرسته هم وکړه.
ښاغلي شیخ صاحب په دې لیدنه کې د شهیدانو کورنیو ته په خطاب کې وویل: د مجاهدینو د جهاد اصلي موخه د دنیوي ګټو ترلاسه کول نه وو، بلکې د هغوی اصلي موخه د اسلامي شریعت او د الهي احکامو پلي کول وو، چې ځینو یې په دې لاره کې خپل خوږ ژوند قرباني کړ.
همدارنګه د یاد وزارت مرستیال د دغه ولایت د شهیدانو او معلولینو چارو ریاست د فعالیتونو او کړنو د ارزونې په ترڅ کې خبرې وکړې او زیاته یې کړه: د دې ریاست لپاره چې کومه بودیجه په ۱۴۰۲ کال کې ځانګړې شوې باید د شهیدانو وارثینو او معلولیت لرونکو وګړو ته د وزارت د پلان او طرحې سره سم پر وخت او شفاف ډول ورکړل شي. نوموړي همداراز د یاد ریاست له مسؤلینو وغوښتل، تر څو کومې مرستې چې د خیریه مؤسسو او بنسټونو له خوا له یاد ریاست سره کیږي باید په واقعي مستحقینو وویشل شي.
