پر شپږ سوه 600 معلولیت لرونکو وګړو او د شهیدانو پر کورنېو د خوراکي توکو کڅوړۍ وویشل شوې
د کابل ولایت په ده سبز ولسوالۍ کې پر درې سوه کورنېو او همداراز د شهیدانو او معلولینو چارو وزارت کې پر درې سوه نورو معلولیت لرونکو وګړو او د شهیدانو کورنېو باندې د( Humanity Welfare Trust) خیریه بنسټ لخوا د خوراکي توکو کڅوړۍ وویشل شوې.
په دغو خوراکي کڅوړو کې چې اوړه، غوړي، وریجې او چڼې شاملې وې، د یاد خیریه بنسټ لخوا د شهیدانو او معلولینو چارو وزارت په همغږۍ د کابل ولایت په ده سبز ولسوالۍ او همدارنګه د شهیدانو او معلولینو چارو وزارت کې پر اړمنو کسانو وویشل شوې.
همداراز د مرستو د ويش پر مهال د (Humanity Welfare Trust) خیریه بنسټ مشر ښاغلي طيب شبير د خیریه مرستو د لړۍ پر ویش د ټینګار تر څنګ پر بهرنيو پانګوالو او خيريه بنسټونو غږ وکړ، چې په دې ناوړه اقتصادي حالت کې دې د افغانستان د خلکو سره مرستې هيرې نه کړي او له هغوې څخه یې وغوښتل چي د دې هیواد زيانمنو شويو خلکو سره اړینې مرستې وکړي.
