د شهیدانو او معلولینو چارو وزارت او د مسلم هندز نړیوالې مؤسسې ترمنځ د هوکړه لیک لاسلیک
د شهیدانو او معلولینو چارو وزارت د یتیمانو د ملاتړ او لاسنیوي په موخه د مسلم هنډز نړیوالې مؤسسې سره د (۹) میلیونه، (۶۴۵) زره (۱۲۰) افغانیو په ارزښت د همکارۍ هوکړه لیک لاسلیک کړ.
د دې هوکړه لیک له مخې، د کابل، پروان، پکتيا، ننګرهار، خوست، غزني، کنړ، لوګر او ميدان وردګو ولايتونو کې (۳۹۴) تنو يتيمانو ته نغدي مرستې ورکول کېږي او هر مستحق یتیم به (۲۴) زره او (۴۸۰) افغانۍ ترلاسه کړي.
یاد هوکړه لیک د شهيدانو او معلولينو چارو وزارت د بهرنيو اړيکو، پلان او تقنين چارو رئيس محترم ملا صدوخان حق شناس او د مسلم هندز نړيوالې مؤسسې رئيس محترم محمد آصف فولاد ترمنځ لاسليک شو.
محترم ملا صدوخان حقشناس د يتيمانو د ملاتړ په برخه کې د مسلم هنډز مؤسسې له مرستو څخه مننه وکړه او د يادې مؤسسې له رئيس څخه يې غوښتنه وکړه چې خپلې مرستې لا پراخې کړي، تر څو زيات شمېر يتيمان د دې مؤسسې تر پوښښ لاندې راشي او له دوامداره ملاتړ څخه برخمن شي.
