په باميان ولايت کې پر (۹۵۰) تنو مستحقو کسانو باندې مرستې ووېشل شوې
د بامیان ولایت د شهيدانو او معلولينو چارو رياست پر (۹۵۰) تنو یتیمانو، کونډو او معلولینو باندې د خوراکي توکو مرستې، چې په هغه کې اوړه او غوړي شامل وو، او د یاد ولایت د والي محترم الحاج مولوي عبدالله سرحدي له لوري د مستحقو کسانو لپاره ځانګړې شوې وې، په شفاف او منظم ډول ووېشل شوې.
د یادو مرستو د وېش پر مهال د بامیان ولایت د شهيدانو او معلولينو چارو رئيس محترم علي خان احمدي، د ولايت مقام استازي محترم حاجي محمد خان غازي هم شتون درلود.
محترم علي خان احمدي د بامیان ولایت د مقام څخه مننه وکړه او زیاته یې کړه: د ټولنې د دې اړمن قشر څخه ملاتړ يوه غوره فرهنګ دی، هغه همداراز د بامیانو ولايت د بېلابېلو ادارو څخه وغوښتل چې په مرستو کې یتیمانو او معلولینو ته لومړیتوب ورکړي.
همداراز، د بامیان ولایت د مقام استازي محترم حاجي محمد خان غازي د مرستو د وېش په پروګرام کې، د یتیمانو او معلولینو په ملاتړ او هغوی ته د نورو مرستو پر برابرولو ټینګار وکړ.
