په بلخ ولایت کې په یو شمېر یتیمانو باندې مرستې ووېشل شوې
د بلخ ولایت د شهیدانو او معلولینو چارو ریاست د اسلامي هوساینې نړیوالې مؤسسې سره په همغږۍ د (۹۰۰) تنو مستحقو یتیمانو لپاره د (۲) میلیونه، (۹۶۳) زره او (۷۰۰) افغانيو په ارزښت اختریزې ډالۍ چمتو کړې دي.
په همدې لړ کې نن (۱۶۹) تنو مستحقو یتیمانو ته یادې اختریزې ډالۍ ووېشل شوې او ټاکل شوې ده چې پاتې نورو مستحقو یتیمانو ته به هم دا مرستې په راتلونکو ورځو کې ووېشل شي، تر څو هغوی هم د نورو ماشومانو په څېر د اختر له خوښیو څخه برخمن شي.
د یادو مرستو د وېش پر مهال د بلخ ولايت د شهیدانو او معلولینو چارو رئيس محترم مولوي جان محمد حکمت، د ولايت مقام، د یو شمېر نورو ادارو استازو او د اسلامي هوساينې نړيوالې مؤسسې مسؤلینو هم شتون درلود.
