د بدخشان ولایت د شهیدانو او معلولینو چارو ریاست کې د دعوت او ارشاد له چارو څخه ارزونه ترسره شوه
د شهیدانو او معلولینو چارو وزارت د دعوت او ارشاد رئیس محترم مفتي عبدالاحد مسعود په مشرۍ یو پلاوي چې د مالي او حسابي چارو رئیس محترم مولوي محمد امین دروېش او د یاد ریاست کارکوونکي محترم مولوي سخي جان یې ملتیا کوله، په بدخشان ولایت کې د شهیدانو او معلولینو چارو په ریاست کې د دعوت او ارشاد چارې له نږدې و ارزولې.
د دعوت او ارشاد رئیس د بدخشان ولایت د شهیدانو او معلولینو چارو ریاست کارکوونکو ته سپارښتنه وکړه چې په ورځنیو چارو کې د امربالمعروف او نهي عن المنکر قانون په بشپړ ډول پلي کړي او د عاليقدر امیرالمؤمنین حفظه الله تعالی احکامو او فرامینو عملي کولو ته ځانګړې پاملرنه وکړي.
همداراز محترم مفتي عبدالاحد مسعود له ټولو کارکوونکو وغوښتل چې د دعوت او ارشاد د تعلیمي نصاب، تدريسي بهير په بشپړ ډول تعقيب کړي.
د یادونې وړ ده چې د بدخشان ولایت د شهیدانو او معلولینو چارو ریاست اړوند د دعوت او ارشاد له مسؤل سره یوه اندازه نغدي مرسته هم ترسره شوه.
