د شهیدانو او معلولینو چارو وزارت مرستیال محترم شیخ صاحب عبدالحکیم حقاني په خوست ولایت کې د دې وزارت له اړوند ریاست د فعالیتونو او کاري بهیر څخه ارزونه ترسره کړه
د شهیدانو او معلولینو چارو وزارت مرستیال محترم شیخ صاحب عبدالحکیم حقاني په مشرۍ یو پلاوي چې د دعوت او ارشاد رئیس محترم مفتي عبدالاحد مسعود، د اطلاعاتو او عامه اړیکو رئیس محترم مفتي فیصل خاموش، د مرکزي مفتشینو آمر محترم مولوي امان الله جمالي یې ملتیا کوله، د خوست ولایت د شهیدانو او معلولینو چارو ریاست د اجراآتو، فعالیتونو او یتیمانو، کونډو او معلولینو ته یې د خدمتونو وړاندې کولو له بهیر څخه ارزونه ترسره کړه.
همداراز محترم شیخ صاحب عبدالحکیم حقاني د خوست ولایت له والي محترم مولوي عبدالقیوم روحاني سره هم وکتل. په دې لیدنه کې د شهیدانو ورثه وو او معلولینو اړوند موضوعاتو د بحث ترڅنګ، د یاد ولایت د شهیدانو او معلولینو چارو ریاست د اداري ودانۍ اړوند ستونزې هم مطرح شوې.
محترم شيخ صاحب د خوست ولایت له والي څخه وغوښتل چې د یاد ریاست د اداري ودانۍ ستونزو د حل په برخه کې لازمه همکاري وکړي.
په ورته وخت کې د خوست ولايت محترم والي هم ژمنه وکړه چې د شهيدانو او معلولینو چارو رياست د اداري ودانۍ د ستونزو د حل په موخه به هر اړخيزې هڅې وکړي، تر څو شته خنډونه له منځه يوړل شي.
