د شهیدانو او معلولینو چارو په وزارت کې د معلولینو چارو ریاست نوی رئیس معرفي او په کار یې پیل وکړ
د معرفي په دې غونډه کې، د مالي او اداري چارو عمومي رئيس محترم مولوي کلیم الله افغان، د کارکوونکو چارو رئیس محترم مولوي محمد موسی صدیقي، د دعوت او ارشاد رئیس محترم مفتي عبدالاحد مسعود، د معلولینو چارو د محاسبې آمر محترم مولوي قدرت الله او اړوندو کارکوونکو شتون درلود.
د شهیدانو او معلولینو چارو وزارت د مقام د لزوم دید او وړاندیز، د ریاست الوزراء عالي مقام د حکم پر اساس، محترم مولوي شاه ولي چې تر دې وړاندې په یاد وزارت کې د آمر په توګه دنده ترسره کوله، د معلولینو چارو د نوي رئیس په توګه، همداراز محترم قاري عبدالکریم حلیمي چې د معلولینو چارو په ریاست کې یې د رئیس په توګه دنده ترسره کوله، د نوي آمر په توګه، د مالي او اداري چارو عمومي رئیس محترم مولوي کلیم الله افغان لخوا اړوند کارکوونکو ته ور وپېژندل شول.
د معرفي په غونډه کې، محترم مولوي کلیم الله افغان د حکومتولۍ په برخه کې تغییر، تبدیل، تنزیل او ترفیع یو مهم اصل وباله. هغه معلولیت لرونکو وګړو ته د خدمتونو وړاندې کولو په برخه کې د معلولینو چارو د پخواني رئیس هلې ځلې وستایلې. همداراز، نوي رئیس ته یې د چارو په ترسره کولو کې د بریالیتوب هیله څرګنده کړه.
همداراز، د کارکوونکو چارو رئیس محترم مولوي محمد موسی صدیقي، معلولینو ته یې د خدمتونو وړاندې کول یو ستر مسؤلیت وګڼل او زیاته یې کړه: د مسؤلیتونو درک او پېژندل د هر کارکوونکي او ادارې لپاره بنسټیز اهمیت لري او د چارو په ترسره کولو کې د اصولو مطابق د ورسپارل شویو دندو ترسره کول، د کارکوونکو ترمنځ د پوره همکارۍ او همغږۍ رامنځته کول، د وخت ښه مدیریت او پېژندنه، د مراجعینو سره ښه چلند، د دندو لایحو او کاري پلان سره سم د ورسپارل شويو مسؤلیتونو ترسره کول یې د بریالي مدیرانو د مهمو ځانګړنو په توګه یاد کړل.
نوموړي له نوي رئیس څخه وغوښتل تر څو خپلې ورسپارل شوې دندې په پوره اخلاص او ایماندارۍ سرته ورسوي، هغه همدا راز د یاد ریاست کارکوونکو ته هم سپارښتنه وکړه، تر څو له نوي ټاکل شوي رئیس سره د رسمي چارو په ترسره کولو کې پوره همکاري وکړي.
