د شهیدانو او معلولینو په چارو کې د دولت وزارت او د یتیمانو مرستندویه نړيوالې موسسې ترمنځ د همکارۍ هوکړه ليک لاسلیک شو
د شهیدانو او معلولینو په چارو کې د دولت وزارت او د یتیمانو مرستندویه نړيوالې موسسې ترمنځ د همکارۍ هوکړه ليک لاسلیک شو
نن چهارشنبه (وږې ۲۶مه)، د شهیدانو او معلولینو په چارو کې د دولت وزارت د نظامي شهیدانو او معلولینو چارو د همغږۍ مرستیالې صبرۍ اندړ او د یتیمانو مرستندویه موسسې مشر عبدالفتاح طیب ترمنځ، د همکارۍ تړون لاسلیک شو.
د یاد تړون له مخې، د یتیمانو مرستندویه موسسه به په هیواد کې یتیمانو او معلولیت لرونکو وګړو لپاره، د حرفوي زده کړو لنډمهالي او اوږدمهالي کورسونه برابروي، نورو نړيوالو او کورنيو مرستندویه بنسټونو ته به یتیمان، معلولین، کونډې او بې وزله کورنۍ ور پېژني.
آغلې اندړ، د یتیمانو مرستندویه نړیوالې موسسې له مشر څخه مننه وکړه، چې له جنګ ځپلو، یتیمانو او بې وزله افغانانو سره د مرستو او لاسنيوي ترڅنګ، د هغوی د ژوند ښه کولو په پار هلې ځلې کوي.
نوموړې د وزارت په استازیتوب د یتیمانو مرستندویه خیریه موسسې مشر ته د هر ډول همکاريو او ملاتړ ډاډ ورکړ او په دې برخه کې یې ورنه د فعالییتونو د لا پراختیا غوښتنه وکړه.
د یتیمانو مرستندویه موسسه یو خیریه بنسټ دی او د افغانستان به ګډون د نړۍ په شپږو هېوادونو کې په رضاکارانه ډول خيريه فعالیتونه کوي.
