ښاغلي لعل الدین آریوبي د د افغانستان بانک په ودانۍ کې د دولتي او خصوصي بانکونو له مسولینو سره ناسته وکړه.

بانکونه باید معلولیت لرونکو وګړو ته د ټولنې د نور وګړو په شان اسانتیاوې برابرې کړي
د شهیدانو او معلولینو په چارو کې د دولت وزیر ښاغلي لعل الدین آریوبي د د افغانستان بانک په ودانۍ کې د دولتي او خصوصي بانکونو له مسولینو سره ناسته وکړه.
د د افغانستان بانک عمومي رییس ښاغلي وحید الله نوشېر وویل، چې د شهیدانو او معلولینو په چارو کې د دولت وزارت تر څنګ باید نور دولتي او غیر دولتي بنسټونه هم معلولیت لرونکو وګړو او د شهیدانو وارثینو ته د مختلفو فرصتونو او اسانتیاوو په برابرولو کې خپل مسولیت ترسره کړي.
ښاغلي آریوبي د یادو ادارو له همکارۍ د مننې تر څنګ وویل، چې خصوصي او دولتي بانکونه باید معلولیت لرونکو وګړو ته هم د ټولنې د نورو وکړو په څېر اسانتیاوې رامنځته او ټولنیز مساوات ته پاملرنه وشي. ښاغلي آریوبي زیاته کړه، چې خصوصي بانکونه دې نابینایانو او ناشنوایانو ته د بانکي حسابونو د پرانیستلو زمینه برابره او تر څنګ یې ATM ماشینونو ته د دوی د لاسرسي په برخه کې اقدام وکړي.
د بانکونو مسولینو د همکارۍ ژمنه وکړه وویل، چې د حسابونو پرانستې او ATM سربېره به په خپلو ټولو بانکي څانګو کې معلولیت لرونکو وګړو ته د رمپ اسانتیاوې رامنځته کړي.
د یادونې وړ ده، چې د یادو چارو د عملي کولو لپاره د شهیدانو او معلولینو په چارو کې د دولت وزارت په مشرۍ یو څلور کسیز کمېسیون، چې د بشر حقونو خپلواک کمېسیون کمېشنره مېرمن بنفشه یعقوبي، د د افغانستان بانک او خصوصي بانکونو استازي پکې شامل دي، جوړ شو او دا کمېسیون به د یوه حقوقي مېکانېزم له ترتیبولو وروسته یادو چارو عملي کولو ته الزامي بڼه ورکړي.