په کنړ ولايت کې له یو شمېر معلولینو سره د اقتصادي ځان بساینې په موخه مرستې ترسره شوې
د کنړ ولايت د شهيدانو او معلولینو چارو رياست د ميرمنو لپاره د مهارتونو د زده کړو او تحقيق مؤسسې سره په همغږۍ په دې ولايت کې (۱۲) تنو معلولینو ته د اقتصادي ځان بساینې په موخه مرستې ووېشلې چې په يادو مرستو کې هر معلول ته د اووه سوه او پنځوس (۷۵۰) امریکايي ډالرو په ارزښت (۴۶) ډوله اجناس او توکي خریداري او د هغوی په واک کې ورکړل شول.
د یادې مرستې د وېش پر مهال د کنړ ولايت د شهيدانو او معلولینو چارو رئيس محترم مفتي عبیدالله حقاني د یادې مؤسسې له مرستو څخه مننه وکړه چې د یاد اړمن قشر لاسنیوی کړی دی.
