په پکتیکا ولایت کې (۱۵۰) تنو مستحقو یتیمانو ته نغدي مرستې ووېشل شوې
د پکتیکا ولایت د شهیدانو او معلولینو چارو ریاست د احساس ټولنیزې مؤسسې سره په همغږۍ د یتیمانو د ملاتړ او لاسنیوي په موخه د یاد ولایت پر (۱۵۰) تنو مستحقو یتیمانو باندې نغدي مرستې ووېشلې چې هر مستحق (۸۰۰۰) افغانۍ ترلاسه کړې.
مستحقو کسانو ته د مرستو د وېش پر مهال د پکتیکا ولایت د شهیدانو او معلولینو چارو رئیس محترم مولوي محمد نبي وهاج، د شهیدانو او معلولینو چارو آمر محترم مولوي سید محمد ابوعرفان او د اقتصاد ریاست استازي حضور درلود او د مرستو د وېش له بهیر څخه یې نظارت ترسره کړ.
محترم مولوي محمد نبي وهاج د احساس ټولنيزې خيريه مؤسسې له مرستو او همکاریو څخه د مننې ترڅنګ وویل: د یتیمانو، کونډو، معلولینو او نورو بېوزلو کورنیو لاسنیوی د ټولوګډ مسئولیت دی او له نورو خیریه بنسټونو او شتمنو هېوادوالو یې هم وغوښتل، چي د ټولنې د زیانمنو او اړمنو کورنیو د ملاتړ په برخه کی خپلې مرستې زیاتې کړي
