په پکتیکا ولایت کې پر (۱۱۵) تنو یتیمانو باندې مرستې ووېشل شوې
د پکتیکا ولایت د شهیدانو او معلولینو چارو ریاست د احساس مرستندویه مؤسسې سره په همغږۍ د یاد ولایت اړوند (۱۱۵) تنو مستحقو یتیمانو ته نغدي مرستې ووېشلې، چې په ترتیب سره هر مستحق (۸۰۰۰) افغانۍ ترلاسه کړې.
یادې مرستې د پکتیکا ولایت د شهیدانو او معلولینو چارو رئیس محترم مولوي محمد نبي وهاج، د اقتصاد ریاست استازي او د خیریه مؤسسې مسؤلینو په شتون کې مستحقو کسانو ته په عادلانه او شفاف ډول ووېشل شوې.
محترم مولوي محمد نبي وهاج د شهیدانو کورنیو ته ډاډ وکړ چې یاد ریاست به هڅه وکړي، شته امکاناتو ته په کتو د هغوی ستونزو او غوښتنو ته رسیدګي وکړي او د خیریه مؤسسو سره په همغږۍ به ورته لازمې مرستې برابرې کړي.
