د ننګرهار ولايت د شهيدانو د ورثې او معلولينو د اسنادو او وثیقو د څېړنې بهیر به ژر بشپړ شي
د ننګرهار ولايت د شهيدانو د ورثې او معلولينو د اسنادو او وثیقو د څېړنې بهیر به ژر بشپړ شي
د شهيدانو او معلولينو په چارو کې د دولت وزير لعل الدين آريوبي په ولسي جرګه کې د ننګرهار د خلکو استازي نبي الله باز، د شهيدانو ورثې او معلولينو سره وکتل.
ښاغلي نبي الله باز د ننګرهار د شهیدانو د ورثې او معلولینو په استازيتوب د ننګرهار ولايت د نظامي او ملکي شهيدانو ورثې او معلولينو ته پر وخت د حقوقو د ورکړې، نویو تثبیت شویو معلولینو او شهیدانو ورثې د بانکي سازۍ، د اسنادو او وثیقو د څېړنې بهیر ژر بشپړولو او برېښنایي تذکرو ورکړې برخه کې پر چټکتیا ټینګار وکړ.
د یاد ولایت د شهيدانو ورثې او معلولينو استازو وړاندیز وکړ چې د نورو چارو تر څنګ باید حکومت د سولې په روان بهير کې هم دوی له پامه ونه غورځوي او ونډه یې هېره نه کړي.
ښاغلي آريوبي د ننګرهار د شهيدانو ورثې او معلولينو استازو نه مننه وکړه، وويل: مسولینو ته یې لارښوونه کړې چې د دې ولايت د شهيدانو د ورثې او معلولينو د اسنادو او وثیقو څیړنه ژر بشپړه کړي.
ښاغلي آریوبي د برېښنایي تذکرو د ورکړې بهیر چټکول مهم وګڼل او د سولې په پروسه کې د معلولینو په ګډون یې تاکید وکړ، وویل چې یاد قشر د جګړې اصلي قرباني دی باید غوښتنو، وړاندیزونو او نظرونو ته یې رسیدګي وشي. زیاته یې کړه چې د یادو مسایلو په اړه یې د معلوماتو او مرکزي احصایې ملي ادارې او د سولې وزارت مسولینو سره ناستې کړي دي.
